قازاقپارات كۇنتىزبەسى: 16- مامىر
اتاۋلى كۇندەر
حالىقارالىق بەيبىت قاتار ءومىر ءسۇرۋ كۇنى
2017 -جىلدىڭ 8- جەلتوقسانىندا بىرىككەن ۇلتتار ۇيىمى باس اسسامبلەياسى 16- مامىردى حالىقارالىق بەيبىت قاتار ءومىر ءسۇرۋ كۇنى دەپ بەكىتتى. ونىڭ ماقساتى - حالىقارالىق قوعامداستىقتىڭ بەيبىتشىلىك، توزىمدىلىك، بىرلىك، ءوزارا تۇسىنىستىك پەن جەر حالقىنىڭ ىنتىماعىن نىعايتۋعا باعىتتالعان كۇش-جىگەرىن ۇنەمى موبيليزاتسيالاۋ.
بيوگرافتار كۇنى بيوگرافيا ءسوزىنىڭ ءوزى ەكى ەجەلگى گرەك سوزدەرىنەن شىققان، ول «ءومىر» جانە «جازامىن» دەگەن ماعىنانى بىلدىرەدى.
بيوگرافتاردىڭ تالماي جاساعان ەڭبەكتەرىنىڭ ارقاسىندا قازىرگى تاڭدا ۇلى ادامداردىڭ وتكەن ءومىرى تۋرالى، ولاردىڭ سول داۋىردەگى داستۇرلەرى مەن ادەت-عۇرىپتارى تۋرالى ماعلۇمات الامىز.
مادەنيەت ەركىندىگى كۇنى
جىل سايىن مامىر ايىنىڭ ءۇشىنشى سەنبىسىندە اتاپ وتىلەدى. بۇل كۇندى 2012-جىلى تەحنولوگيالار ارقىلى ءبىلىم الۋعا ەركىن قولجەتىمدىلىكتى ناسيحاتتايتىن Digital Freedom Foundation كوممەرتسيالىق ەمەس ۇيىمى اتاپ ءوتۋدى ۇسىنعان.
ەستە قالار وقيعالار
1907-جىلى ءابىلقايىر حاننىڭ ۇرپاعى، II مەملەكەتتىك دۋمانىڭ ورال وبلىسىنان سايلانعان دەپۋتاتى باقىتجان قاراتايەۆ مەملەكەتتىك دۋمادا 39-پلەنارلىق ماجىلىسىندە اگرارلىق ماسەلەنى تالقىلاۋعا قاتىسادى. 16- مامىردا سويلەگەن وتكىر سوزىندە ول اگرارلىق جانە ۇلتتىق ماسەلەلەردى قوزعاپ، قازاقستان جەرىنە ورىس جانە ۋكراين كرەستياندارىن كوشىرۋ جونىندەگى ستولىپين جوسپارلارىنىڭ حالىققا قارسى ەكەنىن اشىق ايتىپ، اشكەرەلەدى.
2000-جىلى اكادەميك ومىربەك جولداسبەكوۆ (1931-1999) تۇرعان استانا قالاسىنداعى اباي كوشەسى 1/1 ۇيگە ەسكەرتكىش تاقتا ورناتىلدى. ءو. جولداسبەكوۆ - كورنەكتى مەملەكەت قايراتكەرى، قازاقستان رەسپۋبليكاسىنىڭ جانە حالىقارالىق سىيلىقتاردىڭ لاۋرەاتى، بىرنەشە رەت پارلامەنت دەپۋتاتى بولعان. قازاقستان جوعارى تەحنيكالىق وقۋ ورىندارىنىڭ باعدارلاماسى مەن وقىتۋ جۇيەسىن جاساۋشىلاردىڭ ءبىرى.
2007-جىلى الماتىداعى كوكتوبەدە بريتاندىق بەلگىلى «بيتلز» توبىنا ەسكەرتكىش ورناتىلدى.
2011-جىلى گوللانديانىڭ ديەۆەنتەر قالاسىندا قازاقستان تاۋەلسىزدىگىنىڭ 20 جىلدىعىنا ارنالعان «Discover Kazakhstan» اتتى فەستيۆالى بولىپ ءوتتى.
2011-جىلى ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە تانىمال قازاقستاندىق فيلوسوف جابايحان ءابدىلدين اتىنداعى اۋديتوريا اشىلدى. جابايحان ءابدىلدين 1933-جىلى 16- اقپاندا پاۆلودار وبلىسى ماي اۋدانى، مايتۇبەك اۋىلىندا دۇنيەگە كەلگەن. عالىم، فيلوسوفيا عىلىمىنىڭ دوكتورى (1968)، پروفەسسور (1970)، قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى جانە ۆيتسە-پرەزيدەنتى، قازاقستانداعى ديالەكتيكالىق لوگيكا مەكتەبىنىڭ نەگىزىن سالۋشى.
2012-جىلى ق ر تاۋەلسىزدىگىنىڭ 20 جىلدىعىنا ارناپ شىعارىلعان 10000 تەڭگەلىك قازاقستاندىق ەستەلىك بانكنوتاسى حالىقارالىق بانكنوتالار بىرلەستىگى (IBNS) وتكىزگەن بايقاۋ قورىتىندىلارى بويىنشا «2011 -جىلدىڭ ۇزدىك بانكنوتاسى» اتاندى.
2013-جىلى الماتىدا شىۇ ۋنيۆەرسيتەتىنىڭ العاشقى تۇلەكتەرىنە ديپلومدار تابىستالدى.
2013-جىلى نيۋ-يوركتە قازاقستان رەسپۋبليكاسى مەن سەنت-كيتس جانە نيەۆيستىڭ ب ۇ ۇ جانىنداعى تۇراقتى وكىلدەرى بىرلەسكەن كومميۋنيكەگە قول قويىپ، ەكى ەل اراسىندا ديپلوماتيالىق قاتىناستار ورناتىلدى.
2014-جىلى الماتىدا ك س ر و- نىڭ حالىق ءارتىسى، اتى اڭىزعا اينالعان ديريجەر ءارى ورىنداۋشى نۇرعيسا تىلەنديەۆتىڭ 90 جىلدىعىنىڭ قارساڭىندا ونىڭ 19 جىل تۇرعان پاتەر-مۇراجايى اشىلدى.
2017-جىلى تاراز مەملەكەتتىك پەداگوگيكالىق ينستيتۋتىنىڭ جانىنداعى «باۋىرجان تانۋ» عىلىمي- زەرتتەۋ ورتالىعىنىڭ قىزمەتكەرلەرى ورتالىق مەملەكەتتىك كينوفوتوقۇجاتتار مەن دىبىس جازبالارى مۇراعاتىنان باۋىرجان مومىش ۇلى تۋرالى جاڭا بەينە جانە دىبىس جازبالارىن تاپتى.
2019-جىلى الماتى قالاسىندا تانىمال قازاق رەجيسسەرى شاكەن ايمانوۆتىڭ ءمۇسىنى اشىلدى.
ءمۇسىن قولادان سوعىلعان. اۆتورى - ءمۇسىنشى نۇرلان دالباي. شاكەن ايمانوۆ - قازاقتىڭ ايگىلى اكتەرى ءارى رەجيسسەر.
1964-جىلدان ك س ر و حالىق ءارتىسى. تۋىپ-وسكەن جەرى - پاۆلودار وبلىسىنىڭ باياناۋىل اۋدانى. ايمانوۆ قازاقستان كينەماتوگرافيستەر وداعىن ۇيىمداستىرۋعا قاتىسىپ، وداق باسقارماسىنىڭ 1-حاتشىسى (1958 - 70) قىزمەتىن اتقاردى.
ك س ر و مەملەكەتتىك سىيلىعىنىڭ (1952) جانە قازاق ك س ر مەملەكەتتىك سىيلىعىنىڭ (1968) لاۋرەاتى. 1970-جىلى 24- جەلتوقساندا ماسكەۋ قالاسىندا جول اپاتىنان قايعىلى قازاعا ۇشىرادى.
2019-جىلى حالىقارالىق قارجى ورتالىعى جانە كاتار حاماد بين حاليفا ۋنيۆەرسيتەتىمەن ىنتىماقتاستىق نەگىزىندە الماتىداعى ءال-فارابي اتىنداعى قاز ۇ ۋ- ءدىڭ ەكونوميكا جانە بيزنەس جوعارى مەكتەبىندە بىرەگەي يسلام قارجى ورتالىعى اشىلدى.
