الەمنىڭ ەڭ مىقتى 16 بوكسشىسى استانا تورىندە ايقاسادى

None
None
استانا. قازاقپارات - ق ر مادەنيەت جانە سپورت ءمينيسترى ارىستانبەك مۇحامەدي ۇلى جارتىلاي اۋىر (WBA super) جانە ءبىرىنشى اۋىر (WBA) سالماق دارەجەسىندە الەم چەمپيونى بەيبىت شۇمەنوۆپەن كەزدەستى، دەپ حابارلايدى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ.

كەزدەسۋ بارىسىندا بەيبىت شۇمەنوۆ مينيسترگە الەمنىڭ ەڭ مىقتى 16 كاسىبي بوكسشىسى، ولاردىڭ قاتارىندا كاتار مەملەكەتى كورولدىك وتباسىنىڭ مۇشەسى شەيحى فاحاد بين حاليد ءال-تانيدىڭ قاتىسۋىمەن بوكس كەشىن وتكىزۋدى جوسپارلاپ وتىرعانىن ايتتى. وعان كاتار ءامىرى تاميم بين حاماد ءال-تاني كەلەدى. بوكس كەشىنىڭ باستى قاھارمانى - بەيبىت شۇمەنوۆ. كەشتى اتاقتى مايكل باففەر جۇرگىزۋى ىقتيمال. شاراعا اتتارى اڭىزعا اينالعان بوكسشىلار روبەرتو ديۋران، دەۆيد حەي، حورحە لينارەس، حاسيم راحمان، زاب دجۋدا، ەۆاندەر حوليفيلد، UFC سپورتشىلارى حابيب نۋرماگومەدوۆ جانە زۋبايرا تۋحۋگوۆ، سونىمەن قاتار، دۇنيەجۇزىلىك بوكس قاۋىمداستىعىنىڭ باسشىلىعى كەلەدى دەپ كۇتىلۋدە.

سونداي-اق، كەزدەسۋ بارىسىندا استانادا WBA (دۇنيەجۇزىلىك بوكس قاۋىمداستىعى) ديرەكتورلار كەڭەسىنىڭ جينالىسىن وتكىزۋگە باستى نازار اۋدارىلدى. ارىستانبەك مۇحامەدي ۇلى استانادا وسىنداي اۋقىمدى شارانى وتكىزۋدىڭ ماڭىزدىلىعىن اتاپ ءوتىپ، ەلىمىزدە بوكستىڭ بۇگىنگىدەن دە قارقىندى دامۋىنا سەپ بولاتىنىن ايتتى. سونىمەن قاتار، مينيسترلىكتىڭ اتالعان جيىندى استانادا وتكىزۋ ءۇشىن بار جاعدايدى جاسايتىنىن جەتكىزدى.

ءوز كەزەگىندە، بەيبىت شۇمەنوۆ ارىستانبەك مۇحامەدي ۇلىنا ەلىمىزدە كاسىبي بوكستىڭ دامۋىنا جاساپ جاتقان قولداۋى ءۇشىن العىس ءبىلدىردى.

«بۇگىن، ءبىز وتە ماڭىزدى كەزدەسۋ وتكىزدىك. WBA باسشىلىعى ءبىزدىڭ پروموۋتەرلىك كومپانيامىزعا اتالعان جيىندى استانانىڭ 20 جىلدىعىن مەرەكەلەۋ اياسىندا وتكىزۋ بويىنشا نيەتىن ءبىلدىردى. مەنىڭ ويىمشا، استانا بوكس الەمىندە قوردالانىپ قالعان ماسەلەلەردى شەشۋدە باس قوساتىن تاپتىرماس الاڭ بولماق. بۇل شارا قازاقستاننىڭ كاسىبي بوكسىن دامىتۋ ءۇشىن تۇرتكى بولادى دەپ ەسەپتەيمىن. سونىمەن قاتار، جاستاردىڭ سالاۋاتتى ءومىر سالتىن ۇستانۋعا دەگەن قىزىعۋشىلىعىن وياتادى دەپ بىلەمىن»، - دەدى شۇمەنوۆ.

ايتا كەتەرلىگى، WBA ديرەكتورلار كەڭەسىنىڭ جينالىسى مەن بوكس كەشى شىلدەنىڭ باسىنا جوسپارلانىپ وتىر. وعان ق ر مادەنيەت جانە سپورت مينيسترلىگى، استانا قالاسىنىڭ اكىمدىگى مەن ق ر كاسىبي بوكس فەدەراتسياسى قولداۋ بىلدىرەدى.

سوڭعى جاڭالىقتار