بىلتىر قازاقستانعا 16 مىڭنان استام ورالماندار وتباسى كوشىپ كەلدى
دەپ حابارلايدى قازاقپارات ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنە سىلتەمە جاساي وتىرىپ.
اتالمىش كورسەتكىش 2015 -جىلى وتانىنا ورالعاندارعا قاراعاندا 8 ەسەگە ارتىق. دەگەنمەن، كەلگەن قانداستارىمىزدىڭ باسىم بولىگى تۇرعىلىقتى جەرى رەتىندە استانا مەن الماتى قالالارىن جانە وڭتۇستىك وڭىرلەردى تاڭداعاندىقتان، بۇل رەتتە سولتۇستىك وڭىرلەرگە قونىستانۋدىڭ تەرىس سالدوسى ۇلعايدى.
جالپى، ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ ايتۋىنشا، 1991 -جىلدان 2017 -جىلدىڭ 1- ساۋىرىنە دەيىن 1 ميلليوننان استام ەتنيكالىق قازاق تاريحي اتامەكەنىنە ورالىپ، ورالمان مارتەبەسىن الدى. 2016 -جىلى - 16,4 مىڭ وتباسى (33 754 ادام)، 2017 -جىلدىڭ 1 - توقسانىندا - 2,6 مىڭ وتباسى (4,9 مىڭ ادام).
«وسى ورايدا 2016 -جىلى ەلىمىزگە قونىس اۋدارعان تۇلعالاردىڭ ەڭبەككە جارامدى ۇلەسى 56 پايىزدى قۇراسا، 18 جاسقا دەيىنگى بالالار - 39 پايىز جانە زەينەتكەرلەر - 47 پايىز بولدى. 2017 -جىلى ەلگە ورالعانداردىڭ 26,4 پايىزىن 18 جاسقا دەيىنگى بالالار، 67,3 پايىزىن ەڭبەككە جارامدى جاندار، 6,3 پايىزىن زەينەتكەرلەر يەلەندى»، - دەپ اتاپ ءوتتى مينيستر.
كوش بەت تۇزەگەن نەگىزگى ەلدەردىڭ ىشىندە بىلتىر جانە بيىل وزبەكستان (تيىسىنشە 2016 -جىلى 62 پايىز جانە 2017 -جىلى 54,5 پايىز)، قىتاي ( 2016 -جىلى 14 پايىز جانە 2017 -جىلى 33,4 پايىز) ، موڭعوليا (2016 -جىلى 9 پايىز جانە 2017 -جىلى 2,1 پايىز) ، تۇركىمەنستان ( 2016 -جىلى 6,7 پايىز جانە 2017 -جىلى 4,6 پايىز) مەملەكەتتەرى ەرەكشە كوزگە تۇسەدى.
2016 -جىلى، قونىس اۋدارۋشىلاردى قابىلداۋدا 7 ءوڭىر (اقمولا، اتىراۋ، شىعىس قازاقستان، باتىس قازاقستان، قوستاناي، پاۆلودار جانە سولتۇستىك قازاقستان وبلىستارى) جانە كوشتىڭ قاينار كوزى رەتىندە 4 ءوڭىر (الماتى، جامبىل، ماڭعىستاۋ جانە وڭتۇستىك قازاقستان وبلىستارى) بەلگىلەنگەن. جوعارىدا كەلتىرىلگەن وڭىرلەرگە قونىس اۋدارۋدى ۇيعارعان وتانداستارىمىزعا كوش شىعىندارىن جاباتىن جانە ءبىر جىل بويى باسپانا جالداۋعا قاجەت قارجىنى وتەيتىن قارجى بولىنەدى. 2017 -جىلى 2,7 مىڭ ازاماتتىڭ قونىس اۋدارۋىنا سۋبسيديا تولەۋ كوزدەلگەن.
بيىلعى 3-5 - ءساۋىر ارالىعى وڭتۇستىك قازاقستان وبلىسىنىڭ ەكى اۋدانى مەن شىمكەنت قالاسىندا بوس جۇمىس ورىندارى جارمەڭكەسى ءوتىپ، وندا قوستاناي، پاۆلودار، سولتۇستىك قازاقستان جانە شىعىس قازاقستان وبلىستارىنىڭ 636 جۇمىس بەرۋشىسى ءوندىرىس، ءبىلىم بەرۋ، دەنساۋلىق ساقتاۋ، مەملەكەتتىك باسقارۋ، اۋىلشارۋاشىلىق، قۇرىلىس سالالارىنان 1785 جۇمىس ورنىن ۇسىندى. جارمەڭكە قورىتىندىسىندا 672 وتباسى ەلىمىزدىڭ تەرىسكەي ايماقتارىنا قونىس اۋدارۋعا شەشىم قابىلدادى. وسىمەن بىرگە ەڭبەك رەسۋرستارىنا سۇرانىستى قاناعاتتاندىرۋ مەن ەڭبەك نارىعىنىڭ موبيلدىلىگىن ارتتىرۋ ماسەلەلەرى بويىنشا وڭتۇستىك قازاقستان وبلىسى مەن قوستاناي، پاۆلودار، شىعىس قازاقستان وبلىستارى اكىمدىكتەرى اراسىندا ىنتىماقتاستىق مەموراندۋمىنا قول قويىلدى.
ۇستىمىزدەگى جىلى مينيسترلىك تاراپىنان 2017-2021 -جىلدارعا ارنالعان كوشى- قون ساياساتى تۇجىرىمداماسىن جاساۋ قولعا الىنىپ، وندا كوشى- قون ۇدەرىسىن ءتيىمدى تۇردە رەتتەۋ، ورنىقتى دەموگرافيالىق وركەندەۋ مەن ەلدەگى بىلىكتى جۇمىس كۇشىنە سۇرانىستى قامتاماسىز ەتۋ، ۇلتتىق قاۋىپسىزدىكتى نىعايتۋ ماسەلەلەرى كورىنىس تاباتىن بولادى.
