دانيار ەلەۋسىنوۆ: وليمپيادا چەمپيونى بولۋدى 16 جىل ارماندادىم

 ريو- دە- جانەيرو. قازاقپارات - برازيليانىڭ ريو- دە- جانەيرو قالاسىندا ءوتىپ جاتقان وليمپيادا ويىندارىندا كەشە دانيار ەلەۋسىنوۆ وليمپيادا چەمپيونى اتانعان بولاتىن.
None
None

  بۇگىن سول چەمپيونىمىزدى ارنايى جەڭىسىمەن قۇتتىقتاپ، شاعىن سۇحبات الدىق.

- جەڭىسىڭ قۇتتى بولسىن!

- راحمەت!

- وسى جەڭىستى نەشە جىل ارماندادىڭ؟

- تۇپ- تۋرا 16 -جىل ارماندادىم. 2000 -جىلى سيدنەي وليمپياداسىندا بەكزات ساتتارحانوۆ، ەرماحان ىبىرايىموۆ اعالارىمىز چەمپيون بولعاندا مەن كىشكەنتاي بالا بولاتىنمىن. بالا بولسام دا سول اعالارىما قىزىعىپ، مەن دە وليمپيادا چەمپيونى بولسام عوي دەگەن ءتاتتى ارمان پايدا بولدى. سول ارمانىم وسە كەلە مەنى سپورتقا جەتەلەدى. مىنە، بۇگىن ناتيجەسىن كورىپ وتىرسىزدار. ادام شىنايى ارمانداپ، شىنايى تالپىنسا ءبارى دە ورىندالادى ەكەن.

- وليمپيادا التىنى قولىڭا تيگەن سوڭ، وتكەن ءتۇنى الاڭسىز ۇيىقتاعان بولارسىڭ؟

- جوق، كەرىسىنشە! جەڭىسىمنەن كەيىن تەلەفونىمدا مازا جوق. قۇتتىقتاۋلار ءۇزىلىسسىز كەلىپ جاتىر. ءبارى مەنىڭ قۋانىشىما قۋانىپ جاتىر عوي. تەلەفونىمدى ءسوندىرىپ تاستاپ، قالاي ۇيىقتايىن؟ ەشكىمنىڭ كوڭىلىن قالدىرماي، جاۋاپ بەرۋمەن، جاۋاپ جازۋمەن بولدىم.

- وسىعان دەيىن وليمپيادادان باسقا جۇلدەدەردىڭ بارلىعىنا يە بولدىڭ. قورجىنىڭدا تەك وليمپيادا التىنى عانا جوق ەدى. وعان دا قولىڭ جەتتى. وليمپيادا التىنىنىڭ " ءدامى" قالاي ەكەن؟ قالاي سەزىنىپ جاتسىڭ ءوزىڭدى؟

- وليمپيادا التىنىنىڭ «ءدامى» بولەك ەكەن. مويىنىما ىلگەندە، ءسۇيىپ- ءسۇيىپ جىبەردىم، تىسىمە باستىم. شىنىمەن «التىن الدىم با؟» دەپ وزىمە ىشتەي كۇبىرلەدىم. شىنىمدى ايتسام، ءالى ءتۇسىم سياقتى. نەگىزى، ناعىز "چەمپيون" بولعانىمدى ەلگە بارعاندا ءبىراق سەزىنەتىن شىعارمىن. قازىر ەشتەڭە سەزىنىپ جۇرگەن جوقپىن. ەرتەڭ تاعى دا جارىسقا شىعاتىنداي ءجۇرمىن.

- جەڭىسىڭمەن ءبىرىنشى كىم قۇتتىقتادى؟

 - قاسىمدا ءوزى باپتاپ، ءوزى تاربيەلەگەن اكەم ءجۇر. مەنىڭ ەڭ ءبىرىنشى جەڭىسىمدى قۇتتىقتايتىن دا، جەڭىلىپ جاتسام جۇباتاتىن دا وسى اكەم. سوسىن بارىپ انام قۇتتىقتايدى. ال بيىل اكەمنەن كەيىن، انام وتباسىمىزبەن قۇتتىقتادى. بيىل قۇتتىقتاۋشىلاردىڭ قاتارى كوبەيگەن ءبىزدىڭ ۇيدە. ايەلىم بار، كىشكەنتاي دانيەل دەگەن ۇلىم بار. ول، بۇيىرسا، وسى تامىزدىڭ 27 - كۇنى 1 جاسقا تولادى. مەنىڭ وسى جەڭىسىم وسى وتباسىما ارنالادى. ەلىمە ارنالادى.

- سەندەي وليمپيادا چەمپيونىن شىعارعان اكەڭە مىڭ العىس. ەندى اكەڭە قانداي سىيلىق جاسايسىڭ؟

- مەن اكەمە قانداي سىيلىق جاساسام دا جاراسادى. مەن وسى بيىكتى باعىندىرعانشا قانشاما تەر توكتى، ەڭبەك ەتتى. اكەمنىڭ ەڭبەگىن تىلمەن ايتىپ جەتكىزۋ قيىن. بۇرىندارى اكەمە مەن «ەلدىڭ بالاسىندا انداي بار ەكەن، مىنداي بار ەكەن» دەپ ماعاندا الىپ بەرشى دەپ ەركەلەۋشى ەدىم. ءتىپتى، كولىك اپەرىڭىز دەگەن كەزىم دە بولدى. ءبىراق، اكەم قولىمنان ەشتەڭە قاعىپ كورمەدى. ەلدەن كەم قىلماي ءوسىردى. ەندى مەن اكەمدى باعاتىن جاسقا جەتتىم. ەندى اكەم «ەلدىڭ اكەلەرىندە انداي بار ەكەن، مىنداي بار ەكەن. ونى بالالارى الىپ بەرىپتى» دەپ مەنەن نەنى قالاسا، مەن سونى اكەمە اپەرەتىن بولامىن.

- قازىر ءوزىڭ وتاۋ قۇردىڭ. اتا- اناڭمەن بىرگە تۇراسىڭ با، الدە بولەك تۇراسىڭ با؟

- مەن باس قۇرعالى ءبىر جىل بولدى. اكە- شەشەم ءبارىمىز ءبىر شاڭىراقتىڭ استىندا تۇرىپ جاتىرمىز.

- الداعى ۋاقىتتا دا بىرگە تۇراسىڭ با، الدە بولەك وتاۋ بولىپ وتىرعىڭ كەلە مە؟

 - جوق، اتا- انامنان بولەك كەتپەيمىن. قازاقتا «قارا شاڭىراق» دەگەن بولادى. مەن - ءبىزدىڭ ءۇيدىڭ كەنجەسىمىن. سوندىقتان قارا شاڭىراقتا وتىرىپ، اكە- شەشەمنىڭ قاراتۇياقتارىنان حال كەتكەنشە باعامىن.

- ەندى الدا قانداي جوسپارلارىڭ بار؟

- وسىعان دەيىن، تەك وليمپيادا دەپ كەلدىك. ۇتساق ەكەن دەدىك، ۇتتىق. ەندىگى جوسپاردى، ەلگە امان- ەسەن جەتكەن سوڭ بارىپ جاسايتىن بولامىز.

- بۇگىن، ەرتەڭ ەلگە كەتۋگە اسىعىپ جاتقان جوقسىڭ با؟

- ارينە، اسىعاسىڭ! سەبەبى، ول جاقتا مەنىڭ ەڭ باستى بايلىعىم وتباسىم بار. انام، جان جارىم، باۋىر ەتىم بالام كۇتىپ وتىر. ولارعا جەتۋگە قالاي اسىقپايسىڭ؟ الايدا، بىرگە كەلگەن ارىپتەستەرىمدى تاستاپ كەتۋگە تاعى قيمايمىن. سول ءۇشىن بىرگە كەلدىم، بىرگە كەتەم دەپ شەشتىم.

- اڭگىمەڭە كوپ راحمەت! جەڭىستى قۋانىشتارىڭ ۇزاعىنان ءسۇيىندىرسىن...

اۆتور: كۇنسۇلتان وتارباي

 

سوڭعى جاڭالىقتار