وڭتۇستىك كورەياداعى كورمەدە كۇننەن قۋات وندىرەتىن 160 جاڭا قۇرىلعى قويىلعان
اۋا رايى اشىق بولىپ، قاتىسۋشىلار ءوز قۇرىلعىلارىنىڭ بار مۇمكىندىكتەرىن كورسەتە الدى. ماسەلەن، كورمەگە كەلۋشىلەر انتەنناعا ۇقساس قۇرالدىڭ كومەگىمەن دايىندالعان تاعامداردىڭ ءدامىن تاتتى. وعان كۇن ساۋلەلەرى تۇسكەندە، ول ىدىستى ءجۇز گرادۋس سەلسيگە دەيىن قىزدىرادى. ال وزگە ءبىر قۇرىلعى، كەرىسىنشە، بولمەنى سالقىنداتا الادى.
وسىنداي باتارەيالار قوعامدىق كولىكتىڭ ۇستىنە ورناتىلىپ، كونديسيونەرلەر ونىڭ كۇشىمەن جۇمىس ىستەيدى. العاش رەت سەۋلدەگى كورمەدە جارىسقا قاتىسقان اۆتوكولىك كورسەتىلگەن. ونى سەۋلدەگى كۋنمين ۋنيۆەرسيتەتىنىڭ ستۋدەنتتەرى جاساپ شىعارعان. بوليد اۆستراليادا وتەتىن كۇن كولىكتەرىنىڭ جارىسىندا 3 مىڭ شاقىرىم قاشىقتىقتا ءوتتى. سەۋلدەگى كورمەنىڭ ماقساتى - قالا تۇرعىندارىنىڭ نازارىن كۇن ەنەرگەتيكاسىنا اۋدارۋ. قالا اكىمشىلىگى 2022 -جىلعا دەيىن كۇننىڭ كومەگىمەن ءبىر گيگاۆاتت قۋات وندىرىلەتىنىن مالىمدەدى.
لي سۋ دجين، كۋنمين ۋنيۆەرسيتەتىنىڭ ستۋدەنتى:
- اۆتوكولىگىمىزدىڭ باتارەيالارىن قۋاتتاۋعا 4 ساعات كەتەدى، بۇل كولىكتىڭ ءۇش ساعات جۇرۋىنە جەتەدى. ول ساعاتىنا 130 شاقىرىم قاشىقتىقپەن قوزعالا الادى. اۆسترالياداعى جارىستا ءبىز 44 كوماندا اراسىنان ون ءتورتىنشى ورىندى يەلەندىك. دەگەنمەن كورەيادان كەلگەن جالعىز كوماندا بولعانىمىزدى ماقتان تۇتامىز.
www.24.kz
