07:13, 21 - شىلدە 2015 | GMT +5
ن. نازاربايەۆ پەن ۆ. پۋتين 16 - قىركۇيەكتە سوچيدە وتەتىن ءوڭىرارالىق ىنتىماقتاستىقتىڭ 12 - فورۋمىنا قاتىسادى
استانا. قازاقپارات - بۇگىن ۇكىمەت ۇيىندە ق ر پرەمەر- ءمينيسترىنىڭ ءبىرىنشى ورىنباسارى باقىتجان ساعىنتايەۆتىڭ ءتوراعالىق ەتۋىمەن قازاقستان مەن رەسەي ءوڭىرارالىق ىنتىماقتاستىعىنىڭ XII فورۋمىن وتكىزۋ ماسەلەلەرى بويىنشا ءماجىلىس ءوتتى.
بۇل تۋرالى ق ر پرەمەر- ءمينيسترىنىڭ باسپا ءسوز قىزمەتىنەن حابارلادى.
بۇل فورۋم وسى جىلى 16- قىركۇيەكتە ەكى ەل پرەزيدەنتتەرى ن. نازاربايەۆ پەن ۆ. پۋتيننىڭ قاتىسۋىمەن سوچي قالاسىندا وتەدى. شارانىڭ باستى تاقىرىبى اگرو ونەركاسىپتىك كەشەن جانە ازىق- تۇلىك قاۋىپسىزدىگىن قامتاماسىز ەتۋ سالاسىنداعى ىنتىماقتاستىق بولادى.
فورۋم اياسىندا «اگرو ونەركاسىپتىك كەشەن سالاسىنداعى رەسەيلىك- قازاقستاندىق ىنتىماقتاستىق پەرسپەكتيۆالارى» اتتى مامانداندىرىلعان كورمە، دوڭگەلەك ۇستەلدەر، قازاقستاندىق- رەسەيلىك ىسكەرلىك كەڭەس وتىرىسى، جاستار فورۋمىن وتكىزۋ جوسپارلانۋدا.
ءماجىلىس قورىتىندىسى بويىنشا باقىتجان ساعىنتايەۆ مەملەكەتتىك ورگاندارعا فورۋمعا دايىندىق بويىنشا ۇسىنىستار وڭدەۋدى جەدەلدەتۋدى تاپسىردى.
