جارتى جىلدا استانادا 15 مىڭنان استام نارەستە ومىرگە كەلدى

تامىزدىڭ ءبىرىنشى اپتاسىندا تابيعي جولمەن ەمىزۋدىڭ بالا دەنساۋلىعىنا پايداسىن ءتۇسىندىرۋ ءۇشىن دۇنيەجۇزىلىك دەنساۋلىق ساقتاۋ ۇيىمى، يۋنيسەف جانە كوپتەگەن ەلدەردىڭ دەنساۋلىق ساقتاۋ مينيسترلىكتەرى، ازاماتتىق قوعام وكىلدەرىنىڭ قولداۋىمەن دۇنيەجۇزىلىك ومىراۋ سۇتىمەن ەمىزۋ اپتالىعى ۇيىمداستىرىلدى.
«2023 -جىلعى اپتالىق انا ءسۇتىنىڭ قانشالىقتى پايدالى ەكەنىن تۇسىندىرۋگە، جۇمىس ىستەپ جۇرگەن ايەلدەردىڭ پروبلەماسىنا، ەمىزۋلى بالالارى بار انالاردىڭ قۇقىعىن قورعاۋعا ارنالادى»، - دەدى استانا قالاسىنىڭ باس پەدياترى دانا ابەلگازينا.
ونىڭ ايتۋىنشا، انا قۇقىعىن قورعاپ، جۇكتىلىك دەمالىسىن ۋاقىتىلى بەرۋ، سونداي- اق جۇمىسقا شىققاننان كەيىن دە ولارعا قاجەت جاعداي جاسالۋى باعىتىندا اقپارات تاراتىلدى. بيىلعى جارتى جىلدا استانادا 15121 بالا دۇنيەگە كەلگەن.
كوپتەگەن ەلدەردە كەيىنگى 10 جىلدا بالاعا بەرەتىن ءتۇرلى قوسپالاردان باس تارتىپ، تابيعي انا سۇتىنە كوشىپ جاتقاندار سانى ايتارلىقتاي ارتىپ كەلەدى.
ءوز كەزەگىندە استانا قالاسىنىڭ №3 كوپبەيىندى قالالىق اۋرۋحاناسىنىڭ نەوناتولوگ دارىگەرى ۇلسەرىك قاليبەكوۆا انا ءسۇتى ەمىزۋلى بالانىڭ دەنە ءبىتىمى مەن وي- ساناسىنىڭ تولىققاندى دامۋىنا ىقپال ەتەتىنىن ايتتى.
«بالانىڭ دا، اناسىنىڭ دا دەنساۋلىعىنا وڭتايلى اسەرى بولادى»، - دەدى دارىگەر.
مامانداردىڭ سوزىنە قاراعاندا، فارماتسيەۆتيكالىق كومپانيالاردىڭ جاساندى قوسپالارعا قاتىستى ءتۇرلى جارنامالارى قوعامعا كەرى اسەرىن تيگىزىپ جاتىر. وسىنىڭ سالدارىنان جاس وتباسىلار انا ءسۇتى مەن تابيعي ەمىزۋدىڭ ماڭىزىن تۇسىنبەي جاتادى.
بۇدان بۇرىن حابارلانعانداي، تابيعي انا ءسۇتى الەمدە 820 مىڭ بالانىڭ ءومىرىن قۇتقارادى.