قوشقار 15 ميلليون تەڭگەگە ساتىلىپ، جۇرتتى تاڭعالدىردى
ول جەلىدەگى پاراقشاسىندا جاستاردى مال شارۋاشىلىعىمەن اينالىسۋعا شاقىرىپ، ساتىلعان قوشقاردىڭ ەرەكشەلىگى نەدە ەكەنىن ايتقان.
«اعايىندار، قازاقستاندا قوي شارۋاشىلىعى بويىنشا تاريحي كۇن بۇگىن. ماكسيمۋس ەڭ قىمبات باعالاردىڭ بىرىنە ساتىلىپ جاتىر. 15 ميلليون تەڭگەگە قىزىلاسكەرلىك امانجول باۋىرىمىزعا ساتىلدى. اللا بەرەكەسىن بەرسىن. كوبەيسىن، قوزىسىن الىڭدار، بەرەكە تابىڭدار. موتيۆاتسيا بولسىن جاستارعا، ءبىر كورسەتىپ قويايىق. ويتكەنى «قوشقار، شىنىندا دا، وسىنشاعا ساتىلدى ما؟ مۇمكىن ەمەس» دەيتىن ادامدار دا بار عوي، جوق ەمەس. جاستار قوشقارمەن اينالىسىڭىزدار، قوي باعىڭىزدار. ماكسيمۋس كورمەنىڭ ەكى دۇركىن چەمپيونى بولعان. ءتۇبى قۋانىش مىقتىبايەۆ اعامىزدىڭ شارۋا قوجالىعىنان شىققان، ءوزىمىزدىڭ قازاقستاندىق ءونىم، قازاقستاندا تۋعان قوشقار. وتە اتاقتى قوشقارلاردىڭ ءبىرى، ەلدىڭ ءبارى ماكسيمۋستى تانيدى»، - دەيدى ۆيدەودا بەرىك سۇلتان.
جەلى قولدانۋشىلارى ءبىراۋىزدان ساتتىقتىڭ بەرەكەسىن بەرۋىن تىلەگەن.
«بارەكەلدى، بەرەكەسىن بەرسىن! ايت قۇتتى بولسىن!»، «ماكسيمۋستى قيماي قالدىم وزىمدىكى سياقتى»، «مىقتى، بەرەكەسىن بەرسىن!» - دەپ جازعان الەۋمەتتىك جەلىدەگىلەر.
بەرىك سۇلتان بۇل سالاعا قالاي كەلگەنىن اڭگىمەلەپ بەردى. ونىڭ ايتۋىنشا، العاشىندا بالالارىنا ەرمەك بولسىن دەپ باستاعان.
«قوي شارۋاشىلىعىمەن اينالىسىپ جۇرگەنىمە ءۇش جىلدان استى. قالالىق جەردە تۇرامىز، ءوزىمىز سياقتى بالا-شاعامىز مالدىڭ اراسىندا ءوسىپ جاتقان جوق. بالالارىمىز قالالىق بولىپ، مالدان جيىركەنەتىن بالا بولىپ كەتپەسىن دەگەن نيەتپەن ۇيگە كىشكەنتاي ەكى-ءۇش قوزى الىپ كەلگەنمىن. بۇل شارۋانى بالانىڭ اينالىساتىن ءىسى بولسىن، ءتۇبى اۋىل ەكەنىن ءبىلسىن دەگەن نيەتپەن باستاعانبىز. بەرتىن كەلە ءوزىمىز قىزىعىپ، حوببيگە ۇلاستى. قاراپايىم ەمەس، ەت جانە ماي باعىتىنداعى اسىل تۇقىمدى قوشقارلارعا قىزىعىپ، سولاردى الدىم. قوي ساتىپ الىپ، قوشقارلار قويىپ، ءتولىن الىپ، وسى سالامەن اينالىسىپ ءجۇرمىن. تولىق كاسىپكە اينالدىرعان جوقپىن، حوببي. نەگىزگى ماقسات - بالالاردىڭ جاۋاپكەرشىلىگىن شىڭداۋ. قويعا قاراعان، ۋاقىتىلى جەم-ءشوبىن بەرگەن بالانىڭ بويىنداعى جاۋاپكەرشىلىگى شىڭدالادى»، - دەيدى ول.
بەرىك سۇلتاننىڭ سوزىنشە، بۇعان دەيىن ساتىلعان قوشقارلاردىڭ ىشىندە ەڭ قىمباتى ماكسيمۋس بولىپ وتىر.
«ماكسيمۋس ساتىلعان قوشقارلاردىڭ ىشىندەگى ەڭ قىمباتى. وعان دەيىن دە قىرعىزستانعا 4500 دوللارعا ەكى قوشقار، 4000 دوللارعا ءبىر قوشقار ساتقانمىن. ماكسيمۋستىڭ 3 ايلىق قوزىسىن ءبىر ميلليونعا ساتتىم»، - دەيدى ول.
سەبەبى ونىڭ وزىنە ءتان بىرنەشە ەرەكشەلىگى بار. بەرىك سۇلتان ماكسيمۋستىڭ 4 قوزىسى قالعانىن، ءبىر قوزىسى الەۋمەتتىك جەلىدە 5 ميلليون جيناعانىن ايتتى.
«بۇل قوشقار قازاقستاندا وتكەن كورمەدە ەت جانە ماي باعىتىنداعى قوشقارلاردىڭ ىشىندە بوي جاعىنان ەكى دۇركىن چەمپيونى بولدى. بويى وتە بيىك. قوشقار ءتول بەرۋىمەن باعالانادى. ماكسيمۋستىڭ ەرەكشەلىگى سول - تولدەرىن دە وزىنە ۇقساتىپ بەرەدى. قۇلاعىنىڭ ۇزىندىعى - 20 سانتيمەتر. بويى كورمەدە 106 سانتيمەتر كورسەتتى. قازىر 3 جاستا، ءالى ۇلكەيەدى»، - دەپ ءتۇسىندىردى بەرىك سۇلتان.
بۇعان دەيىن ماكسيمۋستى 10، 13 ميلليون تەڭگەگە سۇراعاندار دا بولىپتى.
«نەگىزگى ساتپايمىن دەپ وتىرعانمىن. تۇنگى ساعات 1 گە دەيىن حابارلاسىپ، قويماي ساتىپ الىپ كەتتى. تاعى ءتولىن الامىن دەپ ويلاعانمىن. 15 ميلليونعا ساتامىن دەپ بۇعان دەيىن ءبىر ايتقانىم بار ەدى. 10 ميلليونعا، 13 ميلليونعا سۇراعاندار بولدى، ساتپاي قويعانمىن. وسى جىگىت ايتقان باعاما الىپ كەتتى»، - دەيدى بەرىك.
مال شارۋاشىلىعىمەن اينالىسۋدىڭ تاربيەلىك ءمانى دە بار. بۇل جىگىتتەر قاۋىمىنا حوببي دە بولا الادى.
«جىگىتتىڭ اينالىساتىن ءبىر حوببيى بولۋى كەرەك. جىگىتتىڭ حوببيى بولماسا، بىرىگىپ جينالىپ كاليانعا بارادى، كلۋبقا كەتىپ قالادى. ۋاقىتىن جامان نارسەلەرمەن وتكىزەدى. حوببيىڭ جىلقى، قوشقار باعۋ بولسا، بوس ۋاقىتىڭدى سوعان جۇمسايسىڭ، سەرگيسىڭ، راحاتتاناسىڭ»، - دەپ تۇيىندەدى اڭگىمەسىن ول.
