ەلىمىزدە 15 مىڭعا جۋىق بالاباقشا مامانى تاپشى
بۇل تۋرالى وقۋ-اعارتۋ مينيسترلىگىنىڭ «بالالاردى ەرتە دامىتۋ ينستيتۋتى» ر م م ديرەكتورى مانارا اداموۆا ايتتى، دەپ حابارلايدى قازاقپارات.
«ەلىمىزدە 15 مىڭعا جۋىق تاربيەشى جەتىسپەيدى. ونىڭ ءبىرىنشى سەبەبى جالاقىنىڭ ازدىعىنا قاتىستى بولىپ تۇر. سوندىقتان جاس ماماندار بۇل سالاعا تارتىلماي جاتىر. سونىمەن قاتار، مەكتەپكە دەيىنگى دايارلىق توبىندا ءبىراز تاجىريبە جيناعان تاربيەشىلەر مەكتەپكە اۋىسىپ كەتەدى. ويتكەنى مەكتەپتە پەداگوگتەردىڭ جالاقىسى جوعارى ەكەنى بەلگىلى»، - دەدى مانارا اداموۆا و ك ق- دا وتكەن باسپا ءسوز ءماسليحاتىندا.
ونىڭ ايتۋىنشا، مەكتەپكە دەيىنگى ءبىلىم بەرۋ ۇيىمدارىندا جۇمىس ىستەپ جۇرگەن پەداگوگتەردىڭ جالاقىسىن ءوسىرۋ باعىتىندا ءتيىستى ءىس-شارالار پىسىقتالىپ جاتىر.
«ەگەر 5 جىلعا دەيىنگى ەڭبەك ءوتىلى بار جانە ەڭ تومەنگى Ⅱ ساناتى بار بالاباقشا پەداگوگىنىڭ ورتاشا ايلىعىنا توقتالساق، شامامەن 164-172 مىڭ تەڭگەنى قۇرايدى. سونىمەن قاتار، تاجىريبەسى جوق، جۇمىسقا ەندى عانا ورنالاسقان جاس ماماننىڭ جالاقىسى 94-120 مىڭ تەڭگە ارالىعىندا بولادى»، - دەدى ينستيتۋت ديرەكتورى.
بۇدان بۇرىن حابارلانعانداي، مەكتەپكە دەيىنگى ءبىلىم بەرۋ ۇيىمدارىندا 97408 پەداگوگ جۇمىس ىستەپ ءجۇر. ونىڭ ىشىندە اۋىلداردا 41596 (%42,7)، ال قالادا 55811 (%57,3) ادام قامتىلعان.
ەلىمىزدەگى مەكتەپكە دەيىنگى ۇيىمداردىڭ 70 پايىزعا جۋىعى قازاق تىلىندە ءبىلىم بەرىپ جاتىر.
كەيىنگى 4 جىلدا بالاباقشا كەزەگىندە تۇرعاندار سانى ەكى ەسەگە ازايدى.
