قازاقستان جانە وزبەكستان پرەزيدەنتتەرىنىڭ قاتىسۋىمەن 15 قۇجاتقا قول قويىلدى

نۇر- سۇلتان. قازاقپارات - قازاقستان جانە وزبەكستان پرەزيدەنتتەرى قاسىم- جومارت توقايەۆ پەن شاۆكات ميرزيەۆ كەڭەيتىلگەن قۇرامدا ەكىجاقتى كەلىسسوز جۇرگىزدى.

بۇل تۋرالى اقوردادان ءمالىم ەتتى، دەپ حابارلايدى قازاقپارات.

قاسىم- جومارت توقايەۆ پەن شاۆكات ميرزيەۆ شاعىن قۇرامدا وتكەن مازمۇندى كەزدەسۋدەن كەيىن ەكى ەلدىڭ رەسمي دەلەگاتسيالارى مۇشەلەرىنىڭ قاتىسۋىمەن كەلىسسوزدى كەڭەيتىلگەن قۇرامدا جالعاستىردى.

پرەزيدەنتتەر ساۋدا- ەكونوميكالىق ىنتىماقتاستىقتى نىعايتۋ، ونىڭ ىشىندە ءوزارا تاۋار اينالىمىن ارتتىرۋ، ينۆەستيتسيا تارتۋ جانە ونەركاسىپ، اۋىل شارۋاشىلىعى، قۇرىلىس، كولىك سالالارى بويىنشا كووپەراتسيانى دامىتۋ ماسەلەلەرىنە باسا ءمان بەردى. سونداي- اق سۋ- ەنەرگەتيكالىق جانە مادەني- گۋمانيتارلىق سالالارداعى ءوزارا ىقپالداستىق ماسەلەسى تالقىلاندى. قاسىم- جومارت توقايەۆ مىزعىماس دوستىق پەن تاتۋ كورشىلىككە نەگىزدەلگەن قازاقستان مەن وزبەكستان اراسىنداعى كوپجاقتى بايلانىستاردىڭ قارقىندى دامىپ كەلە جاتقانىن اتاپ ءوتتى.

- بۇگىندە قازاقستان مەن وزبەكستان اراسىنداعى مىزعىماس دوستىق پەن تاتۋ كورشىلىككە نەگىزدەلگەن سان قىرلى قارىم- قاتىناستاردىڭ ستراتەگيالىق ىقپالداستىق رۋحىندا قارقىندى دامىپ كەلە جاتقانىن ەرەكشە ريزاشىلىقپەن اتاپ وتەمىن. بىرلەسكەن كۇش- جىگەرىمىزدىڭ ارقاسىندا قازاق- وزبەك ىنتىماقتاستىعى بارلىق سالادا بۇرىن- سوڭدى بولماعان شىڭدارعا كوتەرىلدى. قۇرمەتتى شاۆكات ميرومونوۆيچ، وسى وڭ ۇردىسكە ءسىز سۇبەلى ۇلەس قوستىڭىز، - دەدى مەملەكەت باسشىسى.

قازاقستان پرەزيدەنتى بۇگىندە ەكى ەل مەملەكەتارالىق سەرىكتەستىكتىڭ جارقىن ۇلگىسىنە اينالعان بەرىك ءارى ۇيلەسىمدى قارىم- قاتىناس ورناتقانىن ايتتى. بارلىق دەڭگەيدە بەلسەندى ءارى اسا سەنىمدى ساياسي ديالوگ ورناتىلعان. ۇكىمەت دەڭگەيىندەگى جۇيەلى جۇمىستار جۇرگىزىلىپ جاتىر جانە پارلامەنتارالىق بايلانىستار دا نىعايىپ كەلەدى. تاراپتار كوپجاقتى قۇرىلىمدار مەن تەتىكتەر اياسىندا ءوزارا تابىستى جۇمىس ىستەپ جاتىر. قازاقستان مەن وزبەكستاننىڭ ايماقتىق جانە حالىقارالىق كۇن تارتىبىندەگى كوپتەگەن ماسەلەلەر بويىنشا، ونىڭ ىشىندە اۋعانستانداعى احۋالدى تۇراقتاندىرۋ ماسەلەسىنە قاتىستى كوزقاراستارى مەن ۇستانىمدارى ورتاق.

- ساۋدا- ەكونوميكالىق ىنتىماقتاستىقتى دامىتۋدا تەڭدەسسىز ىلگەرىلەۋ بار. بيىلعى 10 ايدىڭ قورىتىندىسى بويىنشا ەكىجاقتى ساۋدا اينالىمى 30 پايىزعا ارتىپ، 3 ميلليارد دوللاردان استى. ءبىز جۋىق ارادا ساۋدا اينالىمىنىڭ كولەمىن 5 ميلليارد دوللارعا، ال ودان كەيىن 10 ميلليارد دوللارعا دەيىن جەتكىزۋ مىندەتىن قويدىق. پىكىرالماسۋ ناتيجەسىندە بۇل قول جەتكىزۋگە بولاتىن ماقسات دەگەن تۇجىرىمعا كەلدىك. ارينە، اتقارۋشى ورگاندار، ەڭ الدىمەن، ۇكىمەتتەرىمىز وسى ماقساتقا جەتۋ ءۇشىن ءتيىستى جۇمىستاردى جۇرگىزۋگە ءتيىس، - دەدى قاسىم- جومارت توقايەۆ.

تاراپتار گۋمانيتارلىق بايلانىستاردىڭ جاندانعانىن وڭ باعالادى. حالىقتارىمىزدىڭ ورتاق رۋحاني- مادەني قۇندىلىقتارىن بايىتا تۇسكەن قازاقستان مەن وزبەكستان جىلدارى ەكى جاقتا دا اتاپ ءوتىلدى. مەملەكەتارالىق قاتىناستاردىڭ مارتەبەسىن وداقتاستىق دەڭگەيىنە دەيىن كوتەرۋ جونىندەگى شەشىم ەكى ەل باسشىلارىنىڭ كەلىسسوزدەرى ناتيجەسىندە قول جەتكىزگەن ماڭىزدى ۋاعدالاستىقتاردىڭ ءبىرى بولدى.

- بۇگىن ءبىز مەملەكەتارالىق قاتىناستاردىڭ مارتەبەسىن وداقتاستىق دەڭگەيىنە دەيىن كوتەرۋگە ۋاعدالاستىق. جاڭا عانا وسى ماسەلە بويىنشا پىكىر الماسىپ، مۇنىڭ ەلدەرىمىز اراسىنداعى مۇلدەم جاڭا ساپالى دەڭگەي ەكەنىن اتاپ وتتىك. ارينە، وداقتاستىق قاتىناستار مەملەكەتتەرىمىزگە ەرەكشە مىندەت جۇكتەيدى. مەن مەملەكەتارالىق كەڭەس قۇرۋ جونىندە ۇسىنىس ايتتىم. وسى كەڭەس اياسىندا ءبىز قاجەتسىز رەسميلىكتەن تىس، ىسكەرلىك نەگىزدە ءجيى باس قوسا الامىز، - دەدى قازاقستان پرەزيدەنتى.

ءوز كەزەگىندە شاۆكات ميرزيەۆ شاعىن قۇرامدا وتكەن كەلىسسوزدىڭ مازمۇندى بولعانىن اتاپ ءوتىپ، ەكى ەل اراسىنداعى ساۋدا اينالىمىنىڭ رەكوردتىق دەڭگەيگە جەتكەنىن جانە بىرلەسكەن جوبالاردىڭ ءساتتى جۇزەگە اسىرىلىپ وتىرعانىن ايتتى.

- ءبىز كوپ قىرلى ىنتىماقتاستىعىمىزدىڭ وزەكتى ماسەلەلەرى بويىنشا مۇددەلەرىمىز بەن ۇستانىمدارىمىزدىڭ ورتاق ەكەنىن تاعى دا دالەلدەدىك. ەلدەرىمىز اراسىندا ورناتىلعان جاقىن ءارى باۋىرلاستىق بايلانىستارىمىزدى جوعارى باعالايمىز. جاڭا عانا قاسىم- جومارت كەمەل ۇلى حالىقتارىمىزدىڭ وسى ساپارعا ريزاشىلىق تانىتىپ جاتقانىن ايتتى. شىن مانىندە، شەكارا ماڭىنداعى ەكى ەلدىڭ دە تۇرعىندارى قاتتى قۋانادى. سەبەبى ءبىز ءجيى كەزدەسكەن سايىن ءوزارا قاتىناستارىمىز جاقسارا تۇسەدى. ماشينا جاساۋ، ەنەرگەتيكا، ەلەكتروتەحنيكا، حيميا، جەڭىل ونەركاسىپ، بانكتەر جانە باسقا دا سالارداعى كووپەراتسيا بويىنشا ءساتتى شىققان جوبالارىمىز بار، - دەدى وزبەكستان پرەزيدەنتى.

قاسىم- جومارت توقايەۆ پەن شاۆكات ميرزيەۆ كەلىسسوزدەر قورىتىندىسى بويىنشا قازاقستان رەسپۋبليكاسى مەن وزبەكستان رەسپۋبليكاسى اراسىنداعى وداقتاستىق بايلانىستار تۋرالى دەكلاراتسياعا قول قويدى. بۇدان بولەك مەملەكەتتەر باسشىلارىنىڭ قاتىسۋىمەن رەسمي دەلەگاتسيالاردىڭ مۇشەلەرى تومەندەگى قۇجاتتارعا قول قويدى:

قازاقستان رەسپۋبليكاسى مەن وزبەكستان رەسپۋبليكاسى اراسىنداعى باس بوستاندىعىنان ايىرۋعا سوتتالعان ادامداردىڭ جازاسىن ودان ءارى وتەۋ ءۇشىن بەرۋ تۋرالى شارت؛

قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق بويىنشا كەلىسىم؛

قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى عارىش كەڭىستىگىن بەيبىت ماقساتتاردا زەرتتەۋ جانە پايدالانۋ سالاسىنداعى ىنتىماقتاستىق تۋرالى كەلىسىم؛

قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى قازاق- وزبەك كەدەندىك شەكاراسى ارقىلى قۇبىرجول كولىگىمەن جانە ەلەكتر بەرۋ جەلىلەرى بويىنشا ەنەرگيا رەسۋرستارىن وتكىزۋ كەزىندەگى بىرلەسكەن كەدەندىك باقىلاۋ تۋرالى كەلىسىم؛

قازاقستان رەسپۋبليكاسىنىڭ سىرتقى ىستەر مينيسترلىگى مەن وزبەكستان رەسپۋبليكاسىنىڭ سىرتقى ىستەر مينيسترلىگى اراسىنداعى 2022-2023 -جىلدارعا ارنالعان ىنتىماقتاستىق باعدارلاماسى؛

«ورتالىق ازيا» حالىقارالىق ونەركاسىپ كووپەراتسياسى ورتالىعىن قۇرۋ تۋرالى تۇجىرىمداما؛

«ورتالىق ازيا» حالىقارالىق ونەركاسىپ كووپەراتسياسى ورتالىعىن قۇرۋ تۋرالى بىرلەسكەن جوسپار؛

تۇركىستان- شىمكەنت- تاشكەنت جوعارى جىلدامدىقتاعى ماگيسترالدىق قۇرىلىس جوبالارىن ىسكە اسىرۋ بويىنشا بىرلەسكەن ءىس- قيمىلدار جوسپارى؛

قازاقستان رەسپۋبليكاسى ساۋدا جانە ينتەگراتسيا مينيسترلىگى مەن وزبەكستان رەسپۋبليكاسى ينۆەستيتسيالار جانە سىرتقى ساۋدا مينيسترلىگى اراسىنداعى ءوزارا تۇسىنىستىك تۋرالى مەموراندۋم؛

2021-2025 -جىلدارعا ارنالعان قىزىلوردا- ءۇشقۇدىق اۆتوكولىك جانە تەمىرجول جولدارىنىڭ قۇرىلىسى جوباسىن ىسكە اسىرۋ جونىندەگى بىرلەسكەن ءىس- قيمىلدار جوسپارى؛

قازاقستان رەسپۋبليكاسى ەنەرگەتيكا مينيسترلىگى مەن وزبەكستان رەسپۋبليكاسى ەنەرگەتيكا مينيسترلىگى اراسىنداعى ەنەرگەتيكا سالاسى بويىنشا ءوزارا ىنتىماقتاستىق تۋرالى مەموراندۋم؛

قازاقستان رەسپۋبليكاسى ادىلەت مينيسترلىگى مەن وزبەكستان رەسپۋبليكاسى ادىلەت مينيسترلىگى اراسىنداعى سوت- ساراپتاما قىزمەتى سالاسى بويىنشا ىنتىماقتاستىق جونىندەگى ءوزارا تۇسىنىستىك تۋرالى مەموراندۋم؛

قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى مەن وزبەكستان رەسپۋبليكاسى جۇمىسپەن قامتۋ جانە ەڭبەك قاتىناستارى مينيسترلىگى اراسىنداعى الەۋمەتتىك- ەڭبەك سالاسى بويىنشا ىنتىماقتاستىق نيەت تۋرالى مەموراندۋم؛

وزبەكستان رەسپۋبليكاسىنا تىكەلەي جەكە شەتەلدىك ينۆەستيتسيالاردى تارتۋدىڭ نەگىزگى شارتتارى تۋرالى كەلىسىم؛ جوبالاردى بىرلەسىپ ىسكە اسىرۋ ماسەلەلەرى بويىنشا ىنتىماقتاستىقتىڭ نەگىزگى شارتتارى تۋرالى مەموراندۋم.