قازاقستاندا 15 جاسقا دەيىنگى بالالار ۇشاققا تەگىن وتىرۋى مۇمكىن: جاڭا باستاما قولعا الىندى

نۇر-سۇلتان. قازاقپارات -قازاقستاندىقتار ەلىمىزدىڭ اۋماعىندا ساياحاتتاعان كەزدە ەكى بالاسىن ۇشاققا تەگىن وتىرعىزا الادى. بۇل تۋرالى «قازاق تۋريزم» ۇلتتىق ۇيىمىنىڭ باسپا ءسوز قىزمەتى ءمالىم ەتتتى.

جاڭا جوبا بويىنشا «1+2» باعدارلاماسى ىسكە قوسىلماق، ياعني 15 جاسقا دەيىنگى بالالار ۇشاق ارقىلى تەگىن ساياحاتتاي الادى.

«قازاقستاندىقتاردىڭ ەل اۋماعىندا دەمالۋعا دەگەن ىنتاسىن ارتتىرۋ ءۇشىن KIDS GO FREE جوباسىن قولعا الدى. قازىرگى تاڭدا اتالمىش باعدارلاما قارجى مينيسترلىگى تاراپىنان رەسپۋبليكالىق بيۋدجەتتىك كوميسسياعا تەكسەرىسكە جىبەرىلدى»، - دەلىنگەن رەسمي حابارلامادا.

وسىلايشا قازاقستاندىقتاردىڭ دەمالىستارىنا جۇمسايتىن شىعىندى %30 عا دەيىن ازايتۋعا بولادى ەكەن.

«ەگەر 100 مىڭ وتباسى نەمەسە 600 مىڭ قازاقستاندىققا سۋبسيديا رەتىندە 7,6 ميلليارد تەڭگە بولىنسە، ەل بيۋدجەتىنە ول اقشا 33 ميلليارد تەڭگە بولىپ قايتا ورالادى. ياعني، بۇل ارقىلى بەس ەسە پايدا تۇسپەك»، - دەپ قوستى ۇيىم وكىلدەرى.

اتاپ كەتەرلىك جايت، ق ر ۇلتتىق ەكونوميكا مينيسترلىگىنىڭ ستاتيستيكالار كوميتەتىنىڭ مالىمەتىنە سۇيەنسەك، وتكەن جىلى ءبىر قازاقستاندىقتىڭ دەمالىسقا جۇمساعان ورتاشا اقشاسى 108 مىڭ تەڭگە (263 دوللاردى) قۇراعان.