قازاقستاندا سوڭعى اپتادا كوروناۆيرۋس جۇقتىرعاندار 15 پايىزعا ارتتى
«الەمدە كوروناۆيرۋستىق ينفەكسيا بويىنشا سىرقاتتانۋ جاعدايى ءالى دە تۇراقسىز. اۋىرعانداردىڭ سانى ءوسىپ وتىر. بۇگىنگى كۇنى الەمدە بارلىعى 5 ميلليونعا جۋىق ادام اۋىرىپ، ونىڭ ىشىندە 324 مىڭ ادام قايتىس بولدى. بۇگىنگى كۇنگە قازاقستاندا 6969 جاعداي تىركەلدى. كۇندەلىكتى ەمدەلىپ شىققان ادامداردىڭ سانى ارتىپ كەلەدى. بارلىعى 3 649 ادام جازىلىپ شىقتى. بۇل اۋىرعانداردىڭ 50 پايىزىن قۇرايدى. سوڭعى تاۋلىكتە ەلدە 218 جاڭا جاعداي تىركەلدى. ءوسۋ قارقىنى 3,2 پايىزدى قۇرادى. ونىڭ ىشىندە 25- ءى ناۋقاستارمەن بايلانىستا بولعاندار، 28- ءى سكرينينگ بارىسىندا انىقتالعاندار، 21- ءى اۋرۋحاناعا جۇگىنگەندەر، 17- ءسى سىرتتان اكەلگەندەر»، - دەدى باس سانيتارلىق دارىگەر ورتالىق كوممۋنيكاتسيالار قىزمەتىندەگى بريفينگتە.
ونىڭ اتاپ وتۋىنشە، سوڭعى اپتا ىشىندە ەلىمىزدە كورونۆيرۋسپەن سىرقاتتاندانۋ ءوسىمى 15 پايىزعا جەتىپ وتىر. «بۇل ەڭ الدىمەن كوروناۆيرۋس ينفەكسياسىنا تەست وتكىزۋ كولەمىنىڭ ارتۋىمەن بايلانىستى. كوروناۆيرۋس ينفەكسياسى تىركەلگەن ساتتەن بەرى بۇگىنگى كۇنگە دەيىن 559 مىڭنان استام تەست جاسالدى. ناۋرىز ايىمەن سالىستىرعاندا تاۋلىك ىشىندە تەستىلەۋ سانى 6 مىڭنان 23 مىڭعا دەيىن ۇلعايدى. بۇل تاۋەكەل توبىنا كىرەتىن تۇلعالار اراسىندا سكرينينگ جۇرگىزۋ ارقىلى ناۋقاستاردى انىقتاۋعا باعىتتالعان جۇمىستار جۇرگىزۋىمىزگە مۇمكىندىك بەردى»، - دەدى ايجان ەسماعامبەتوۆ.
