قازاقپارات كۇنتىزبەسى: 15- مامىر
اتاۋلى كۇندەر
حالىقارالىق وتباسى كۇنى
1993-جىلدان باستاپ، ب ۇ ۇ باس اسسامبلەياسىنىڭ قارارىنا سايكەس جىل سايىن اتاپ وتىلەدى.
بۇل كۇندى بەلگىلەۋ - وتباسىنداعى كوپتەگەن پروبلەمالارعا ەلدەگى قوعامنىڭ نازارىن اۋدارا ءتۇسۋ ماقساتىن كوزدەيدى.
ب ۇ ۇ ساراپشىلارىنىڭ پىكىرى بويىنشا، ءبىر وتباسىنداعى نەگىزگى قۇقىقتارعا كوز جۇما قاراۋ، ونداي پروبلەمالاردى ەلەمەي، قۇقىقتى بەلدەن باسۋ - تۇتاستاي ادامزاتتىق وتباسىنا دا قاۋىپ توندىرە تۇسەدى.
حالىقارالىق كليمات كۇنى
1992-جىلى حالىقارالىق قاۋىمداستىق پارنيكتى گازداردىڭ اۋاعا تارالۋىمەن بايلانىستى قاۋىپتى مويىنداي وتىرىپ، ب ۇ ۇ- نىڭ كليماتتىڭ وزگەرۋى ماسەلەلەرى جونىندەگى كونۆەنتسياسىنا قول قويۋ تۋرالى ۋاعدالاستى.
ەستە قالار وقيعالار
1989-جىلى الماتىدا قازاقتىڭ ۇلى عالىمى، اعارتۋشى، شىعىستانۋشى، تاريحشى، ەتنولوگ، گەوگراف، فولكلورتانۋشى شوقان ءۋاليحانوۆتىڭ ەسكەرتكىشى اشىلدى. ەسكەرتكىش اۆتورلارى - ءمۇسىنشى حاكىمجان ناۋرىزبايەۆ پەن ساۋلەتشى شوتا ءۋاليحانوۆ.
1992-جىلى تاشكەنتتە قازاقستان، ارمەنيا، قىرعىزستان، رەسەي جانە وزبەكستان مەملەكەتتەرى اراسىندا ۇجىمدىق قاۋىپسىزدىك تۋرالى شارتقا قول قويىلدى. ازەربايجان كەلىسىمگە 1993-جىلعى 24- قىركۇيەكتە، گرۋزيا 1993-جىلعى 9- قىركۇيەكتە، بەلارۋس 1993-جىلعى 31- جەلتوقساندا قول قويدى.
1999-جىلعى 2- ساۋىردە ارمەنيا، بەلارۋس، قازاقستان، قىرعىزستان، رەسەي جانە تاجىكستان پرەزيدەنتتەرى كەلىسىمنىڭ مەرزىمىن كەلەسى بەسجىلدىققا ۇزارتۋ تۋرالى حاتتاماعا قول قويدى. الايدا ازەربايجان، گرۋزيا جانە وزبەكستان ونىڭ مەرزىمىن ۇزارتۋدان باس تارتىپ، وزبەكستان سول جىلى دەموكراتيا جانە ەكونوميكالىق دامۋ ۇيىمىنا قوسىلدى. ۇ ق ش- ءنىڭ 2002-جىلعى 14- مامىردا ماسكەۋدە وتكەن سەسسياسىندا ۇيىمدى تولىققاندى حالىقارالىق ۇيىمعا - ۇجىمدىق قاۋىپسىزدىك تۋرالى شارت ۇيىمىنا (ۇ ق ش ۇ) اينالدىرۋ تۋرالى شەشىم قابىلداندى.
1992-جىلى قازاقستان رەسپۋبليكاسىنىڭ ۇلتتىق يادرولىق ورتالىعى مەن اتوم ەنەرگەتيكاسى جونىندەگى اگەنتتىگى قۇرىلدى.
1999-جىلى قازاقستان رەسپۋبليكاسىندا ۇكىمەت قۇرامىنا كىرمەيتىن، ورتالىق اتقارۋشى ورگان - قازاقستان رەسپۋبليكاسىنىڭ مەملەكەتتىك قۇپيالاردى قورعاۋ جونىندەگى اگەنتتىگى قۇرىلدى.
2009-جىلى بەرليندە قازاقستاننىڭ گەرمانياداعى جىلى اۋقىمىندا «حالىقارالىق باعدارلامالار ورتالىعى» ا ق- نىڭ («بولاشاق») گەرمانياداعى جانە ەۋروپاداعى قۇرلىقتىق ەلدەردەگى وكىلدىكتەرى رەسمي تۇردە اشىلدى.
2013-جىلى نيۋ-يوركتە قازاقستان رەسپۋبليكاسى جانە دومينيكا دوستاستىعىنىڭ ب ۇ ۇ جانىنداعى تۇراقتى وكىلدەرى بىرلەسكەن كومميۋنيكەگە قول قويىپ، ەكى ەل اراسىندا ديپلوماتيالىق قاتىناستار ورناتىلدى.
2015-جىلى قازاقستاندىق اسكەري قىزمەتشىلەر 3D- قۇرىلعىلار ارقىلى اسكەري تەحنيكانىڭ تولىق ۇلگىسى مەن ونىڭ قۇرامداس بولشەكتەرىن جاساۋعا كىرىستى. تۇڭعىش پرەزيدەنت- ەلباسى اتىنداعى ۇلتتىق قورعانىس ۋنيۆەرسيتەتىنىڭ بازاسىندا جاڭا جوعارى تەحنولوگيالىق ينجەنەرلىك-تەحنيكالىق زەرتحانانىڭ ارقاسىندا جۇزەگە استى.
2016-جىلى پاريجدە Carrousel du Louvre گالەرەياسىندا دارىندى قازاقستاندىق سۋرەتشىلەردىڭ «قازاقستان عاجايىپتارى» كورمەسى اشىلدى.
2018-جىلى «بۋراباي دامۋ» ۆيزيت-ورتالىعىندا بۋراباي تاريحى مۋزەيى اشىلدى. ول 3 زالدان تۇرادى: تاريح زالى، ەتنوگرافيا زالى جانە بۋرابايدى زەرتتەۋشىلەر زالى.
2019-جىلى پاريجدە حالىقارالىق تۇركى اكادەمياسىنىڭ «ۇلى دالا: مادەني مۇرا جانە الەم تاريحىنداعى ءرولى» اتتى فورۋمى باستالدى.
حالىقارالىق جيىنعا امەريكا قۇراما شتاتتارى، رەسەي، ءۇندىستان، قىتاي، ۇلى بريتانيا، ازەربايجان، قازاقستان، قىرعىزستان، تۇركيا، وزبەكستان، فرانسيا، لاتۆيا، گوللانديا جانە ماجارستان سىندى ەلدەردەن 70 كە جۋىق عالىم جانە UNESCO وكىلدەرى قاتىسىپ جاتىر.
جيىندا تۇركى تىلدەس ەلدەردىڭ تاريحىندا ايرىقشا ورنى بار التىن وردا مەن موعولستاننىڭ قۇرىلۋىنا ىقپال ەتكەن تالاس قۇرىلتايىنىڭ - 750، ءجۇسىپ بالاساعۇننىڭ «قۇتتى بىلىك» شىعارماسىنىڭ جازىلۋىنىڭ - 950، اقىن يمامەددين ءناسيميدىڭ - 650 جىلدىعى سەكىلدى ايتۋلى تاريحي وقيعالار تالقىلاندى.
