كارانتين تالاپتارىن بۇزعاندارعا ەندى ايىپپۇل سالىنىپ، 15 تاۋلىككە قامالۋى مۇمكىن

نۇر- سۇلتان. قازاقپارات – ق ر اقپارات جانە قوعامدىق دامۋ ءمينيسترى داۋرەن ابايەۆ كارانتين رەجيمى كۇشەيتىلگەن كەزدەگى كوشەدە ءجۇرۋ تالاپتارىن ءتۇسىندىردى، دەپ حابارلايدى قازاقپارات ءتىلشىسى.

«قوعامدىق كولىكتىڭ جۇمىسى ماسەلەسىن اكىمدىكتەر پىسىقتاپ جاتىر. جاعدايعا قاراي قوعامدىق كولىك قوزعالىسى شەكتەلۋى مۇمكىن. ساياباقتار مەن اللەيالاردا پاترۋل جۇرگىزىلەدى. ازاماتتار ءۇي جانۋارلارىن تۇرعىن ءۇي ماڭىندا سەرۋەندەتە الادى. ال ەگەر ازاماتتار باسقا سەبەپتەرمەن شىقسا، الدىمەن ەسكەرتۋ جاسالادى، ودان كەيىن 26 جارىم مىڭ تەڭگە كولەمىندە ايىپپۇل سالىنۋى نەمەسە 15 تاۋلىككە دەيىن اكىمشىلىك قاماۋعا الىنۋى مۇمكىن»، - دەدى مينيستر «حابار 24» تەلەارناسىنىڭ تىكەلەي ەفيرىندەگى مالىمدەمەسىندە.

ونىڭ ايتۋىنشا، پوليتسيا قىزمەتكەرلەرى حاتتاما تولتىرىپ، ءىستى سوت قارايدى. ودان بولەك، ت ج كەزەڭىنە بيلىك وكىلىنىڭ زاڭدى تالابىنا باعىنباعانى ءۇشىن قىلمىستىق جاۋاپكەرشىلىك كوزدەلگەن. ايتا كەتەيىك، كوروناۆيرۋس ينفەكسياسىمەن نۇر- سۇلتان قالاسى بويىنشا 60 ادام، الماتى قالاسىندا - 48 ادام، قاراعاندى قالاسىندا – 4، جامبىل وبلىسىندا -3 ادام، اتىراۋ وبلىسى - 3 ادام، شىمكەنت قالاسىندا - 2 ادام، الماتى وبلىسىندا - 1 ادام، اقتوبە وبلىسىندا - 1 ادام، سولتۇستىك قازاقستان وبلىسىندا - 1 ادام، اقمولا وبلىسىندا - 1 ادام، پاۆلودار وبلىسىندا - 1 ادام، جالپى 125 ناۋقاس تىركەلدى.

اۆتور: ايجان سەرىكجان قىزى