نازاربايەۆ پەن پۋتين پەتروپاۆلداعى ءوڭىرارالىق ىنتىماقتاستىقتىڭ 15- فورۋمىنا قاتىسادى
«9- قاراشادا پەتروپاۆل قالاسىندا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ پەن رەسەي فەدەراتسياسىنىڭ پرەزيدەنتى ۆلاديمير پۋتيننىڭ قاتىسۋىمەن قازاقستان مەن رەسەي ءوڭىرارالىق ىنتىماقتاستىعىنىڭ 15-فورۋمى وتەدى. 15-فورۋمنىڭ تاقىرىبى - «قازاقستان مەن رەسەيدەگى تۋريزمدى دامىتۋدىڭ جاڭا تاسىلدەرى مەن ۇردىستەرى»، - دەدى ق ر س ءى م رەسمي وكىلى ايبەك سمادياروۆ بۇگىنگى بريفينگتە.
ونىڭ ايتۋىنشا، ءىس-شاراعا مينيسترلىكتەر مەن ۆەدومستۆولاردىڭ جەتەكشىلەرى، قازاقستان مەن رەسەي وڭىرلەرىنىڭ باسشىلارى، تۋريزم سالاسىنداعى بيزنەس وكىلدەرى قاتىسادى.
«قازاقستان مەن رەسەي ىنتىماقتاستىعىنىڭ ءوڭىرارالىق فورۋمدارى جىل سايىن وتكىزىلەدى. فورۋمدى وتكىزۋدىڭ ون بەس جىلدىق تاريحىندا ول ەكى ەل اراسىنداعى ساياسي جانە ەكونوميكالىق ءوزارا ءىس-قيمىلدىڭ ماڭىزدى ينستيتۋتى رەتىندە قالىپتاسىپ، ءوزىن ءتيىمدى مەملەكەتارالىق الاڭ رەتىندە تانىتا ءبىلدى. الداعى ءىس-شارانىڭ نەگىزگى ماقساتى قازاقستان مەن رەسەي اراسىنداعى تۋريستىك سالاداعى ءوزارا ءىس-قيمىلدى كەڭەيتۋ، ونىڭ ىشىندە، ەكى ەلدىڭ ىسكەر توپتارى مەن مەملەكەتتىك قۇرىلىمدارى اراسىنداعى كووپەراتسيالىق بايلانىستاردى تەرەڭدەتۋ ارقىلى تۋريزمنىڭ ارتۇرلەرىن دامىتۋ جانە العا جىلجىتۋدىڭ وزىق تاجىريبەسىمەن الماسۋ، تۋريستىك يندۋسترياعا ءوزارا ينۆەستيتسيالاردىڭ كەلۋىن ىنتالاندىرۋ بولىپ تابىلادى»، - دەدى ول.
فورۋم اياسىندا قازاقستان-رەسەي ىسكەرلىك كەڭەسىنىڭ وتىرىسى، قازاقستان-رەسەي تۋريستىك كورمەسى، پلەنارلىق وتىرىس، سونداي-اق ۇكىمەتارالىق، ءوڭىرارالىق جانە كوممەرتسيالىق باعىتتاعى 30 قۇجاتقا قول قويۋ جوسپارلانۋدا