وزبەكستان پرەزيدەنتى 15- ناۋرىزدا قازاقستانعا جۇمىس ساپارىمەن كەلەدى
ساپار بارىسىندا وزبەك دەلەگاتسياسى كەڭ اۋقىمدى كۇن ءتارتىپتى قامتيتىن ورتالىق ازيانىڭ ەلدەرى مەملەكەت باسشىلارىنىڭ ءبىرىنشى جۇمىس (كونسۋلتاتيۆتىك) كەزدەسۋىنە قاتىسادى. بۇل كەزدەسۋ 2017-جىلى ب ۇ ۇ باس اسسامبلەياسىنىڭ 72-سەسسياسىندا ءسوز سويلەگەن پرەزيدەنت ش. ميرزيەيەۆتىڭ ۇسىنىسى بولاتىن، ول ونى قاراشا ايىندا سامارقاندتا وتكەن «ورتالىق ازيا: تۇراقتى دامۋ جانە بىرگە وركەندەۋ ءۇشىن ورتاق تاريح جانە ورتاق بولاشاق» اتتى حالىقارالىق كونفەرەنسيادا جەتىلدىرىپ تۇتاس باعدارلاماعا اينالدىردى.
وزبەكستاننىڭ باستاماسى ايماقتاعى بارلىق ەلدىڭ قولداۋىنا يە بولدى. قازاقستان العاشقى كەزدەسۋدى استانادا جوعارى دەڭگەيدە وتكىزۋدى ۇسىنعان بولاتىن.
سول كۇنى وزبەكستاننىڭ باسشىسى قازاقستانداعى وزبەكستان جىلىنىڭ رەسمي اشىلۋ راسىمىنە قاتىسادى. سونداي-اق وزبەكستان پرەزيدەنتى مەن قازاقستان پرەزيدەنتىنىڭ ەكىجاقتى كەزدەسۋى جوسپارلانعان.
ايتا كەتسەك، وزبەكستان پرەزيدەنتىنىڭ باسپا ءسوز حاتشىسى كوميل اللامجونوۆتىڭ مالىمدەۋىنشە بۇعان دەيىن شەت ەلدەردە وزبەكستان كۇندەرى وتكىزىلگەن، الايدا وزبەكستان جىلى العاش رەت وتكىزىلمەكشى. وسىعان بايلانىستى اۋقىمدى ءىس-شاراعا ازىرلەنۋ ءۇشىن استاناعا قۇرامىندا مادەنيەت جانە ونەر قايراتكەرلەرى، قولونەرشىلەر، جۋرناليستەر جانە باسقا سالا وكىلدەرى بار وزبەكستاننىڭ دەلەگاتسياسى كەلدى.
ەسكە سالا كەتسەك، قازاقستانداعى وزبەكستان جىلىنىڭ سالتاناتتى اشىلۋ ءراسىمى تۋرالى بۇعان دەيىن ەلباسىنىڭ الداعى جۇمىس كەستەسىن جاريا ەتكەن اقوردا باسپا ءسوز قىزمەتى حابارلاعان بولاتىن.
اۆتور: اينۇر اقبايەۆا
