شاحماتتان 15 جاستاعى اسەل سەرىكباي الەم چەمپيونى اتاندى

قىزىلوردا. قازاقپارات- رۋمىنيانىڭ ياسسى قالاسىندا شاحماتتان وقۋشىلار اراسىندا وتكەن الەم چەمپيوناتىندا قازاقستاندىق سپورتشىلار تابىستى ونەر كورسەتتى، دەپ حابارلادى قازاقپارات ح ا ا ءتىلشىسى. 

قىزىلوردا وبلىستىق دەنە شىنىقتىرۋ جانە سپورت باسقارماسىنان ءمالىم ەتكەندەي، 15 جاسقا دەيىن قىزدار اراسىندا ونەر كورسەتكەن اسەل سەرىكباي الەم چەمپيونى اتانىپ، ەلىمىزدىڭ ابىرويىن اسقاقتاتتى.

ول شۆەيتسارلىق جۇيە بويىنشا وتكەن 9 تۋردان 8,5 ۇپاي جينادى. سونداي-اق، 13 جاسقا دەيىنگى قىزدار اراسىندا سىنعا تۇسكەن نازەركە نۇرعالي 9 تۋردان 7,5 ۇپاي جيناپ، الەم چەمپيوناتىنىڭ كۇمىس جۇلدەسىن يەلەندى.

ايتا كەتەيىك، ءدۇبىرلى دوداعا ەلىمىزدەن 33 سپورتشى قاتىسىپ، ونىڭ ىشىندە تەك قىزىلوردالىق قوس شاحماتشى عانا جۇلدەلى ورىنداردى يەلەندى. جالپى الەم چەمپيوناتىنا 45 مەملەكەتتەن 670 سپورتشى شەبەرلىك بايقاستى. قوس سپورتشىمىز ەندى قىركۇيەك، قازان ايلارىندا ۋرۋگۆاي جانە يتاليادا وتەتىن الەم چەمپيوناتتارىنا دايىندالادى.

اۆتور: ەلۋباي اۋەزوۆ