مانەرلەپ سىرعاناۋدان 15 جاسار قازاق قىزى ەرەسەكتەر اراسىنداعى حالىقارالىق تۋرنيردە توپ جاردى

قىزىلوردا. قازاقپارات - قىزىلوردالىق ون بەس جاسار ەليزابەت تۇرسىنبايەۆا مانەرلەپ سىرعاناۋدان كەزەكتى جەڭىسىنە قول جەتكىزدى.

ول حالىقارالىق Skate Canada Autumn Classic تۋرنيرىندە ەرەسەكتەر اراسىندا ۇزدىك دەپ تانىلدى. بۇل تۋرالى وبلىستىق دەنە شىنىقتىرۋ جانە سپورت باسقارماسىنىڭ باسپا ءسوز قىزمەتى حابارلادى.

كانادانىڭ بارري قالاسىندا وتكەن ءدۇبىرلى دودادا قىسقا باعدارلاما بويىنشا ەليزابەت ەكىنشى كورسەتكىش كورسەتسە، ەركىن باعدارلاما كەزىندە بارىنەن وق بويى وزىق شىعىپ تۋرنير جەڭىمپازى اتاندى.

ول جارىس كەزىندە 179,72 بال جينادى، بۇل ونىڭ سپورتتىق جولىنداعى ەڭ جوعارى كورسەتكىشى بوپ تابىلادى.

ايتا كەتەيىك، ەليزابەت قازان ايىنىڭ 23-25- ارالىعىندا امەريكادا ەرەسەكتەر اراسىندا وتەتىن گران-پري جارىسىندا باق سىنايدى. بۇل تارتىستا ونىڭ قارسىلاستارى وليمپيادا چەمپيونى يۋليا ليپنيتسكايا جانە تاعى باسقا مىقتىلار بولادى دەپ كۇتىلۋدە.

اۆتور: ەلۋباي اۋەزوۆ