قازاقستاندا جاڭا كاسىپورىندى 15 مينۋتتىڭ ىشىندە تىركەۋگە بولادى

استانا. قازاقپارات - قازاقستاندا حالىققا قىزمەت كورسەتۋ ورتالىقتارىندا جاڭادان اشىلاتىن كاسىپورىنداردى ون بەس مينۋتتىڭ ىشىندە تىركەۋگە بولادى.

بۇل تۋرالى بۇگىن ورتالىق كوممۋنيكاتسيالار قىزمەتىندە وتاندىق بيزنەستى دامىتۋ مەن قولداۋ تاقىرىبى بويىنشا وتكەن بريفينگتە «دامۋ» كاسىپكەرلىكتى دامىتۋ قورى» ا ق باسقارۋشى ديرەكتورى عابيت لەسبەكوۆ ءمالىم ەتتى.

باسقارۋشى ديرەكتوردىڭ ايتۋىنشا، بۇگىنگى كۇنى ەلىمىزدىڭ بارلىق وڭىرلەرىندە حالىققا قىزمەت كورسەتۋ ورتالىقتارىندا كاسىپكەرلىكتى تىركەۋ قىزمەتى جۇزەگە اسۋدا.

«ءبىز «اتامەكەن» ۇلتتىق كاسىپكەرلەر پالاتاسىمەن بىرلەسە وتىرىپ، بيزنەس ءۇشىن ءبارىن جاڭادان باستاۋدان كاسىپورىن قۇرۋعا دەيىنگى وقىتۋ، كونسۋلتاتسيالار بەرۋ قىزمەتتەرىن جۇزەگە اسىرىپ جاتىرمىز. قازىرگى تاڭدا ح ق ك و- دا ون بەس مينۋتتىڭ ىشىندە جاڭا كاسىپورىندى تىركەۋ مۇمكىندىكتەرى دە قامتىلدى. تۋرا سول جەرلەردە بيزنەس-جوسپارلاردى جازۋ، ماركەتينگتىك كونسۋلتاتسيالار بەرۋ تەگىن نەگىزدە جۇرگىزىلەدى»، - دەدى عابيت لەسبەكوۆ.

ونىڭ ايتۋىنشا، بۇگىنگى كۇنى وڭىرلەردە جاستار كاسىپكەرلىگىن قولداۋعا دا جان-جاقتى نازار اۋدارىلۋدا. ماسەلەن، «دامۋ» قورى استانا قالاسى اكىمدىگىمەن بىرىگىپ «Astana-Damu-ZhasStarT» باعدارلاماسىن ازىرلەگەن. باعدارلاما ەكونوميكانىڭ ءتۇرلى سالالارىنداعى ءىسىن جاڭادان باستاعان جاس كاسىپكەرلەردىڭ جوبالارىن قولداۋعا ارنالدى. بۇل رەتتە جاس كاسىپكەرلەر ءۇشىن جالپى سوماسى 20 ميلليون تەڭگە، سىياقىنىڭ جىلدىق ستاۆكاسى 7 پايىزدى قۇرايتىن كرەديتتەر قاراستىرىلادى. سونىمەن قاتار «دامۋ» قورى ءىسىن جاڭادان باستاعان جاس كاسىپكەرگە نەسيە سوماسىنان %85 دەيىن كولەمدە كەپىلدىك بەرەدى.

اۆتور: قانات مامەتقازى ۇلى