الماتى قالاسى عالامدىق قارجى ورتالىقتارى رەيتينگىسىندە 15 ساتىعا جوعارى كوتەرىلدى

الماتى. قازاقپارات - الماتى قالاسىنىڭ وڭىرلىك قارجى ورتالىعى عالامدىق قارجى ورتالىقتارى رەيتينگىسىندە GFCI) 15) ساتى جوعارى كوتەرىلىپ، 83 حالىقارالىق قارجى ورتالىقتارى ىشىندە 43- ورىنعا جايعاستى. بۇل تۋرالى بۇگىن قازاقستان رەسپۋبليكاسى ۇلتتىق بانكىنىڭ باسپا ءسوز قىزمەتىنەن حابارلادى.

الماتى قالاسى شىعىس ەۋروپا-ورتالىق ازيا ايماعىندا ىستامبۇل قالاسىنان كەيىن ەكىنشى ورىندا كەلەدى. الماتىدان كەيىن پراگا، ۆارشاۆا، سانكت-پەتەربور، بۋداپەشت، تاللين جانە افينى قالالارى ورنالاسقان.

بۇل جەتىستىك الماتى قالاسى ءۇشىن ەرەكشە ماڭىزعا يە. ويتكەنى GFCI رەيتينگىسى ينۆەستيتسيالىق يندۋستريا سالاسىنىڭ 3 مىڭنان استام ماماندارىنان الىنعان 25 مىڭنان استام جاۋاپتار نەگىزىندە قۇرالعان. اتالمىش رەيتينگتىڭ باستى ماقساتى - الەمدەگى نەگىزگى قارجى ورتالىقتارىنىڭ باسەكەگە قابىلەتتىلىگى دەڭگەيىن زەرتتەۋ.

الماتى قالاسى العاش رەت GFCI رەيتينگىسىنە 2014-جىلى ناۋرىز ايىندا ەنگىزىلىپ، حالىقارالىق قارجى ورتالىقتارىنىڭ رەسمي تىزىمىندە 58- ورىنعا جايعاسقان بولاتىن.

ايتا كەتەلىك، GFCI رەيتينگىسى 83 حالىقارالىق قارجى ورتالىقتارىنىڭ رەيتينگتىك باعالارىنىڭ مامانداندىرىلعان ادىستەمەسى بولىپ تابىلادى. ونى Z/Yen Group Limited كومپانياسى لوندون قالاسىنىڭ باسشىلىعىنا ارناپ ازىرلەيدى.

ال الماتى قالاسىنىڭ وڭىرلىك قارجى ورتالىعى (ءا و ق و) - قارجى ورتالىعىنىڭ قاتىسۋشىلارى مەن مۇددەلى تۇلعالاردىڭ ءوزارا ارەكەتتەسۋىن رەتتەيتىن ەرەكشە قۇقىقتىق ءتارتىپ. ونىڭ قىزمەتى قازاقستان رەسپۋبليكاسىنىڭ قارجى نارىعىن دامىتۋعا باعىتتالعان. الماتى قالاسىنىڭ وڭىرلىك قارجى ورتالىعىن دامىتۋ بويىنشا قىزمەتتى قازاقستان رەسپۋبليكاسىنىڭ ۇلتتىق بانكى جۇزەگە اسىرادى.

اۆتور: جاپپاربەرگەن ايبوتا