احمەت بايتۇرسىن ۇلىنىڭ كەيىنگە شەگەرىلگەن 150 جىلدىق مەرەيتويىنىڭ قاشان وتەتىنى بەلگىلى بولدى
بۇل تۋرالى ۇيىمداستىرۋ القاسىنان ءمالىم ەتتى، دەپ حابارلايدى قازاقپارات ءتىلشىسى.
«بيىلعى جىلدىڭ 3-5-قىركۇيەك كۇندەرىنە جوسپارلانعان احمەت بايتۇرسىن ۇلىنىڭ 150 جىلدىق مەرەيتويىنا ارنالعان ءىس-شارالار اۋليەكول اۋدانىنداعى توتەنشە جاعدايدىڭ سالدارىنان كەيىنگە شەگەرىلگەن بولاتىن. ۇكىمەت پەن جەرگىلىكتى اتقارۋشى ورگاندار تاراپىنان زارداپ شەككەن تۇرعىندارعا كومەك كورسەتىلدى. قازىرگى تاڭدا جاعداي تۇراقتالدى.
وسىعان وراي، ۇلت ۇستازىنىڭ مەرەيتويى 1-قازان كۇنى اتاپ وتىلەتىن بولادى. مەرەكەلىك شارالار احمەت بايتۇرسىن ۇلى جانە تورعاي اۋىلدارىندا وتەدى.
باعدارلاما بويىنشا سارىتۇبەك قونىسىندا احمەت بايتۇرسىن ۇلىنىڭ كەسەنەسىنە تاعزىم جاساۋ، مۋزەي-ءۇيدىڭ تۇساۋكەسەرى ءوتىپ، اس بەرىلەدى. تورعاي اۋىلىندا سپورتتىق شارالار (قازاق كۇرەسى، ات جارىسى)، ەسكەرتكىشتىڭ اشىلۋى، رەەكسپوزيتسيادان كەيىنگى ا. بايتۇرسىن ۇلى مەن م. دۋلات ۇلىنىڭ ادەبي مۋزەيىنىڭ تۇساۋكەسەرى، عىلىمي-پراكتيكالىق كونفەرەنسيا جوسپارلانعان»، - دەلىنگەن ۇيىمداستىرۋ القاسىنىڭ حابارالاماسىندا.
ەسكە سالايىق، قوستانايداعى الاپات ءورت كەزىندە وڭىرگە جۇمىس ساپارىمەن بارعان پرەزيدەنت قاسىم-جومارت توقايەۆ احمەت بايتۇرسىن ۇلىنىڭ مەرەيتويىنا قاتىستى پىكىر بىلدىرگەن ەدى. ول جولى مەملەكەت باسشىسى ورتپەن بايلانىستى جاعداي تۇراقتالىپ، زارداپ شەككەندەرگە كومەك كورسەتىلگەن سوڭ احمەت بايتۇرسىن ۇلىنىڭ تۋعان جەرىنە باراتىنىن مالىمدەگەن بولاتىن.
اۆتور ءاليحان اسقار
