اقتوتى رايىمقۇلوۆا داڭقتى بالۋان قاجىمۇقاننىڭ 150 جىلدىعىنىڭ اشىلۋ راسىمىنە قاتىستى
جيىندا ءسوز العان اقتوتى رايىمقۇلوۆا اتى اڭىزعا اينالعان تۇلعانىڭ مەرەيتويىن مينيسترلىك رەسپۋبليكالىق دەڭگەيدە اتاپ وتۋگە دايىندالىپ جاتقاندىعىن، ارنايى ءىس- شارالار جوسپارى دايىندالعانىن ايتتى.
«قاجىمۇقان اتامىز - بار عۇمىرىن كۇرەس ونەرىنە ارناپ، كوزى تىرىسىندە اڭىزعا اينالعان ازامات. كەي دەرەكتەرگە سەنسەك، بالۋان بابامىز كۇرەستىڭ بىرنەشە تۇرىنەن 54 مەملەكەتتە كۇرەسىپ، 48 مەدال ولجالاعان. سونىمەن قاتار قاجىمۇقان مۇڭايتپاس ۇلى ەل ەسىندە بوزكىلەم تورىندەگى بالۋاندىعىمەن قاتار، دومبىرا شەرتىپ، ءان سالعان سەگىز قىرلى، ءبىر سىرلى تۇلعا رەتىندە قالعان. باتىر بابامىزدىڭ 150 جىلدىعى وسى جىلى رەسپۋبليكا اۋماعىندا اتاپ وتىلەدى. بۇگىن الەمدى الاڭداتقان پاندەمياعا بايلانىستى سالتاناتتى اشىلۋ ءراسىمىن كەڭ كولەمدە اتاپ ءوتۋ مۇمكىن بولماي وتىر. دەسەك تە، بۇعان قاراماستان بابامىزدىڭ 150 جىلدىعى لايىقتى، جوعارى دەڭگەيدە مەرەكەلەنەدى. قاجىمۇقان مۇڭايتپاس ۇلىنىڭ ەسىمىن ۇلىقتاۋ، ماڭگىلىك ەستە قالدىرۋ ماقساتىندا ارنايى رەسپۋبليكالىق ءىس- شارالار جوسپارى ازىرلەندى. بۇگىننەن باستاپ رەسپۋبليكامىزدىڭ بارلىق وڭىرىندە ءتۇرلى ءىس- شارالار وتكىزىلەدى. وسى ءساتتى پايدالانا وتىرىپ، بارشاڭىزدى ءبىر كىسىدەي اتسالىسۋعا شاقىرامىن»، - دەدى مينيستر.
ءىس- شارا اياسىندا بەلگىلى سپورتشى سەرگەي سىرۋلنيكوۆ، تيمۋر سىپاتايەۆ سەكىلدى ەلىمىزگە تانىمال زور كۇش يەلەرى ونەر كورسەتتى. ءوز كەزەگىندە سەرگەي سىرۋلنيكوۆ وتكەن عاسىر پالۋاندارىنىڭ مۇراسىن جاڭعىرتۋ ماڭىزدىلىعىنا توقتالدى.
«مەرەيتويدىڭ ماقساتى - وسكەلەڭ ۇرپاقتىڭ بويىنا اتا- بابالارىمىز اماناتتاپ كەتكەن قاسيەتتەردى ءسىڭىرۋ. وتكەن اتا- بابامىزدىڭ مۇراسىن جاڭعىرتىپ، سونىڭ نەگىزىندە جاستاردى تاربيەلەۋگە بولادى. سونىمەن قاتار، ەلىمىزدە بۇقارالىق جانە بالالار- جاسوسپىرىمدەر سپورتىنا اسا ءمان بەرۋ ماڭىزدى. سول جەردەن بولاشاق چەمپيوندار شىعادى. مينيسترلىكتىڭ قولداۋىمەن مەن دە وسى باعىتتى دامىتۋدى جوسپارلاپ وتىرمىن»، - دەدى سەرگەي سىرۋلنيكوۆ.
ءىس- شارا كەزىندە بارلىق سانيتاريا- ەپيدەميولوگيا تالابى قاتاڭ ساقتالدى.
اۆتور: مارلان جيەمباي
