استانادا جولاقىنى قولما-قول تولەۋ 150 تەڭگەگە كوتەرىلمەك
استانا قالاسى ءۇشىنشى اۆتوبۋس پاركىنىڭ ديرەكتورى باۋىرجان تىلەۋبەرگەنوۆ ەلوردانىڭ قوعامدىق كولىكتەرىندە جولاقى تولەۋدە سارالانعان قۇن قولدانۋدى ۇسىندى.
«بۇگىندە الماتىدا سارالانعان تاريف ەنگىزىلگەن. وندا كارتوچكامەن 80 تەڭگە جانە قولما-قول 120 تەڭگە تولەيسىڭ. بىزدە ەلەكتروندى جولاقى تولەۋ جۇيەسىن جىلدامىراق ەنگىزۋ ءۇشىن كارتوچكامەن 90 تەڭگەنى قالدىرىپ، قولما-قول تولەمدى 150 تەڭگەگە كوتەرۋ كەرەك.
سايكەسىنشە، ەكسپرەسس اۆتوبۋستاردا جولاقى 200 تەڭگە بولۋى ءتيىس»، - دەدى تىلەۋبەرگەنوۆ «Astana LRT» ۇيىمداستىرعان استانانىڭ اۆتوبۋس پاركتەرىنە پرەسس-تۋر بارىسىندا.
اۆتوبۋس پاركىنىڭ باسشىسى جۇرگىزۋشىلەردىڭ جالاقىسى تومەن دەگەن سىبىستى جوققا شىعارىپ، ولار ورتاشا 350 مىڭ تەڭگە الاتىنىن ايتتى.
«ەگەر تاريفتى كوتەرىپ، جاعار-جانارماي مەن قوسالقى بولشەكتەر قۇنىن تومەندەتسە، مەن ولارعا كوبىرەك تولەۋگە دايىنمىن. تاريفتى مەن بايىپ كەتۋ ءۇشىن ەمەس، جۇرگىزۋشىلەر مەن كوندۋكتورلارعا جاعداي جاساۋ ءۇشىن كوتەرۋ كەرەك دەپ ەسەپتەيمىن، ولار سوعان لايىقتى ەڭبەك ەتىپ جاتىر»، - دەپ ءتۇسىندىردى تىلەۋبەرگەنوۆ.
