قازاقستانعا 1500-3000 دوللارلىق جالاقى الاتىن 35 مىڭ مامان قاجەت

استانا. قازاقپارات - ەلىمىزگە كيبەرقاۋىپسىزدىك سالاسىنداعى كاسىبي ماماندار قاجەت.

وسى سالادا ورتاشا جالاقى شامامەن 1500 - 3000 دوللاردى قۇرايدى، دەپ حابارلايدى قازاقپارات ءتىلشىسى.

ق ر قورعانىس جانە اەروعارىش ونەركاسىبى ۆيتسە-ءمينيسترى تيمۋر شايمەردەنوۆتىڭ ايتۋىنشا، بۇگىندە وتاندىق كيبەرقاۋىپسىزدىك سالاسىنا 35 مىڭ مامان قاجەت. ەلىمىزدە وسى ساناتتاعى مامانداردىڭ سانى 50 پروتسەنتكە دە جەتپەيدى. «قازىر رەسپۋبليكا بويىنشا شامامەن 80 ۇيىم بار. اربىرەۋىندە جەكە اقپاراتتىق جۇيە بار»، - دەدى ت. شايمەردەنوۆ ق ر پارلامەنت سەناتىندا وتكەن جيىندا.

مينيسترلىكتىڭ مالىمەتىنە سايكەس، مەملەكەتتىك ورگانداردا 1500 مامان جۇمىس ىستەيدى. ءبىراق ونىڭ ءوزى از بولىپ تۇر. مەملەكەتتىك سەكتوردىڭ كيبەرقاۋىپسىزدىگىن قامتاماسىز ەتۋ ءۇشىن تاعى سونشا مامان قاجەت. ال جەكە مەنشىك كومپانيالاردىڭ بارلىعىن قامتۋ ءۇشىن 35000 مامان كەرەك.

ق ر ۇلتتىق قاۋىپسىزدىك كوميتەتىنىڭ اقپاراتتىق قاۋىپسىزدىك دەپارتامەنتىنىڭ باسشىسى سەرگەي جۋراۆليەۆتىڭ سوزىنە قاراعاندا، مەملەكەتتىك سەكتوردا كيبەرقاۋىپسىزدىك ماماندارى ايىنا 500-600 دوللار الادى. ال جەكە مەنشىك سالادا ولاردىڭ جالاقىسى 1500-3000 دوللارعا دەيىن بارادى.

«نەگىزى، الەمدىك تاجىريبە كورسەتىپ وتىرعانداي، كيبەرقاۋىپسىزدىك نارىعىمەن جەكە مەنشىك سەكتور اينالىسادى. بۇل دەگەنىمىز، مەملەكەت قاجەتتى جاعدايدى جاسايدى، ال جەكە مەنشىك كومپانيالار اقپاراتتىق قاۋىپسىزدىك شارالارىمەن اينالىسادى»، - دەيدى س. جۋراۆليەۆ.

ايتا كەتەيىك، الداعى ۋاقىتتا قازاقستاندا «قازاقستاننىڭ كيبەرقالقانى» تۇجىرىمداماسى اياسىندا جاڭا اكادەميانى اشۋ جوسپارلانىپ وتىر. ال ق ر ۇ ق ك شەكارا قىزمەتىندە جاڭا باتالون قۇرىلادى.