ەلىمىزگە جىل سايىن 14 ميلليون ادام كىرىپ-شىعادى

استانا. قازاقپارات - قازاقستانعا كەلۋ مەن ەلدەن شەتەلگە شىعۋ پروتسەسى جەتىلدىرىلىپ جاتىر. تولىعىراق ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتى ءتوراعاسىنىڭ مىندەتىن اتقارۋشى ءىلياس يسپانوۆ ايتىپ بەردى، دەپ حابارلايدى قازاقپارات ءتىلشىسى.

«قازاقستانعا جىل سايىن 14 ميلليون ادام كەلەدى جانە 14 ميلليون ادام شىعادى. ولاردىڭ ءبارىن توپتاستىرا كەلە 13 باعىتقا بولدىك. ول باعىتتار جۇمىسىن اۆتوماتتاندىرىپ، ەلىمىزگە كىرىپ-شىعاتىن ازاماتتارعا ىڭعايلى بولۋى ءۇشىن «ءبىر تەرەزە» قاعيداتى نەمەسە موبيلدى قوسىمشا ارقىلى قىزمەت كورسەتۋ جاعىن قولعا الدىق. الدىمەن جۇمىس قانداس مارتەبەسىن بەرۋدى اۆتوماتتاندىرۋدان باستالدى»، - دەدى ءىلياس يسپانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

كوشى-قون كوميتەتى باسشىسىنىڭ مالىمدەۋىنشە، قازاقستانعا كەلەتىن جانە شەتەلگە شىعاتىن ازاماتتاردىڭ ماقساتى مەن مەرزىمى بويىنشا ءبىرىڭعاي ەسەپ جۇرگىزۋ مىندەتى تۇر.

«ەندى بەلگىلى ءبىر قىزمەت الۋ ءۇشىن ءار مەملەكەتتىك ورگاننىڭ ەسىگىن توزدىرۋدىڭ قاجەتى جوق. سونداي-اق، قازاقستانعا كەلگەن شەتەل ازاماتتارىنا مەديتسينالىق كومەك كورسەتۋ، ولاردى تىركەۋ جاعى دا اۆتوماتتاندىرىلادى. ەڭ باستىسى ەلگە كەلگەن ازاماتتاردىڭ زاڭدى بۇزباي، قۇقىق بۇزۋشىلىققا بارماۋىن ەسكەرتەمىز»، - دەيدى مينيسترلىك وكىلى.

سونداي-اق، بريفينگ بارىسىندا كوشى-قون ماسەلەسىنە قاتىستى بىرنەشە جايتتار بەلگىلى بولدى.

اتاپ ايتقاندا، ەلىمىزگە ينۆەستيسيا قۇيعان شەتەل ازاماتتارىنا يمميگرانت ۆيزاسىمەن قاتار 10 جىل تۇرۋعا رۇقسات بەرىلمەك.

بۇگىندە قازاقستاندا 14417 شەتەل ازاماتى جۇمىس ىستەپ جاتىر.

قازاقستاندىقتاردىڭ وڭتۇستىك كورەيادا ەڭبەك ەتۋ ماسەلەسىن ەكىجاقتى كەلىسىم ارقىلى زاڭداستىرۋ جاعى قارالىپ جاتىر.

الداعى ۋاقىتتا قانداس مارتەبەسىنە قۇجاتتار قازاقستاننىڭ شەتەلدەگى ەلشىلىكتەرىندە قابىلدانادى.

وڭتۇستىك كورەياعا جۇمىس ىستەۋگە باراتىن قازاقستاندىقتاردى الدىن الا دايىندايدى. ولارعا سول ەلدىڭ زاڭدىلىقتارى مەن ءتارتىبى ۇيرەتىلەدى.

ودان بولەك، ەڭبەك مينيسترلىگى ەلىمىزگە كەلەتىن بوسقىنداردىڭ مارتەبەسى ارتا تۇسەتىنىن حابارلادى.