بۇگىن، 14-ناۋرىز - كونەدەن كەلە جاتقان كورىسۋ كۇنى
14- ناۋرىز كۇنى جاسى كىشىلەر اقساقالدار مەن اق جاۋلىقتى اجەلەرگە بارىپ، قوس قولىن بەرىپ، كورىسەدى. بۇل كۇنى جاسى ۇلكەندەر كىشىلەردى كۇتىپ، كەلگەندەرگە «ءبىر جاسىڭمەن! جاس قايىرلى بولسىن، ءومىر جاسىڭ ۇزاق بولسىن!» دەپ ەرەكشە مەيىرىممەن باتاسىن بەرەدى. وسى كۇنى ءار ۇيدە داستارحان جايىلىپ، ۇلتتىق تاعامدار قويىلىپ، ادامدار ءبىر-بىرىمەن قۇشاق جايا امانداسىپ، ەسەندىك سۇراسادى. كوڭىلدە وكپە-رەنىشتەرى بولسا، كەشىرەدى. تاتۋلىققا باستايتىن بۇل جول يسلام قاعيداتتارىنا دا وتە جاقىن.
بۇل مەرەكە باتىس قازاقستان، اتىراۋ وبلىستارىندا جانە اقتوبەنىڭ كەيبىر اۋداندارىندا، رەسەيدىڭ كورشىلەس استراحان، ساراتوۆ، ورىنبور وڭىرلەرىندە، قاراقالپاقستاندا اتالىپ وتەدى.
كورىسۋ - قازاق حالقىنىڭ وسكەلەڭ ۇرپاقتى ىزەتتىلىك پەن مەيىرىمدىلىككە، اۋىزبىرشىلىك پەن كىشىپەيىلدىلىككە، تاتۋلىق پەن باۋىرمالدىققا باستايتىن ەرەكشە ۇردىستەرىنىڭ ءبىرى. بۇل مەرەكەنى ماڭعىستاۋ ءوڭىرىنىڭ جۇرتى امال مەرەكەسى دەپ تە اتايدى.
سوڭعى جىلدارى قازاقستاندا مەيرام اياسى كەڭەيىپ كەلەدى. ماسەلەن، بيىل العاش رەت قىزىلوردا وبلىسىندا وسى مەرەكە تويلانباق.
سونداي-اق، بۇل كۇنى ءار وتباسى كورشىلەرىمەن كورىسەدى. بۇل كۇنى ءار ادام مىندەتتى تۇردە ءۇش ءۇيدىڭ ەسىگىن اشۋى كەرەك، ياعني تۇسكە دەيىن ءۇش ۇيگە كىرىپ، كورىسىپ ۇلگەرۋى ءتيىس. ءۇيدى-ءۇيدى قىدىرىپ جۇرگەندە كىشكەنتاي بالالارعا انالارى شاعىن دوربا ۇستاتىپ قويادى. بالاقاي قاي ۇيگە كورىسۋگە كىرسە، سول ءۇيدىڭ داستارحانىنان اۋىز ءتيىپ، باۋىرساق، تاتتىلەردەن سالىپ الادى. بۇل جورالعى جىل بويى بالالارىمىز توق ءجۇرسىن، داستارحانىمىز ارالاس بولسىن، قارىم-قاتىناسىمىزعا سىزات تۇسپەسىن دەگەن نيەتتەن تۋعان.
ءبىر ەرەكشەلىگى - كورىسۋ ءبىر كۇنمەن شەكتەلەتىن مەرەكە ەمەس، ول ناۋرىزدىڭ 14-ىنەن باستالىپ، ايدىڭ سوڭىنا دەيىن جالعاسا بەرەدى.
