شىمكەنتتەگى زاۋىت 14 ميلليون دانا قىش شىعارىپ ۇلگەرگەن
جەرگىلىكتى ءونىم ايماقتاعى قارقىنى ۇدەي تۇسكەن قۇرىلىس جۇمىستارىندا قولدانىلۋدا. وتاندىق ونىمگە سۇرانىس جوعارى. زاۋىت اشىلعالى بەرى قىشتىڭ 14 ميلليون داناسىن شىعارىپ ۇلگەرىپتى. مۇنىمەن كوپقاباتتى 36 تۇرعىن ءۇي سالۋعا بولادى ەكەن. ولجاس باسقاراتىن ەكسكوۆاتور تاۋلىك بويى ءۇزىلىسسىز جۇمىس ىستەيدى. ەگەر توقتاپ قالسا، زاۋلاپ تۇرعان زاۋىت شيكىزاتسىز قالادى. سوندىقتان جاس مامان ءوز ىسىنە وتە جاۋاپتى قارايدى.
بىرنەشە رەت ەلەكتەن ءوتىپ قويماعا جينالعان توپىراق قالىپتاۋ بولىمىنە جەتكىزىلەدى. يلەۋى قانىپ، سىعىمدالعان ءونىم ارنايى قوندىرعىنىڭ كومەگىمەن كەسىلىپ، قازاندىققا دايىندالادى. قام قىشتار بىردەن جارىلىپ كەتپەس ءۇشىن بىرنەشە ساعات بويى جىلىجايدا ساقتالادى. قارا توپىراق ءونىم بولىپ شىققانعا دەيىن بىرنەشە مارتە ستانوكتان وتەدى. وعان ارنايى قوسپالار قوسىلادى. قىشتىڭ قۇرامىندا ءتىپتى كومىر دە بار. بۇل، بىرىنشىدەن، ءونىمنىڭ ساپاسىن جانە توزىمدىلىگىن ارتتىرادى. كاسىپورىنداعى وسى زامانعى وزىق تەحنولوگيانىڭ ءتىلىن اۋىل ازاماتتارى تولىق مەڭگەرگەن. قوندىرعىلار جىل ون ەكى اي توقتاۋسىز جۇمىس ىستەيدى. قازىر 65 ادام ءۇش اۋىسىممەن ەڭبەك ەتىپ ءجۇر. زاۋىتتاعى قۇرالدار جىلىنا ءبىر رەت قانا - توزعان بولشەكتەرىن اۋىستىرىپ، تۇتاس تازالاۋ ءۇشىن عانا توقتاتىلادى ەكەن. شيكىزات تا جەرگىلىكتى جەردىكى. ول ساپا مەن باعاعا دا اسەر ەتەدى.
زاماناۋي كاسىپورىنعا قازاندىق قىتايدان قۇراستىرعان كۇيىندە تۇتاستاي اكەلىنگەن. ىشىنە ءبىر مەزەتتە 41 تىركەمە ەمىن- ەركىن سيادى. گازبەن جاناتىن پەشتىڭ ىستىقتىعى 900 گرادۋسقا دەيىن جەتەدى. بۇگىندە زاۋىت 350 توننا شيكىزاتتان تاۋلىگىنە 70 مىڭ دانا قىش شىعارىپ جاتىر. باستىسى، وتاندىق ءونىم ەكولوگيالىق تازا. جول، ەلەكتر جەلىسى مەن گاز قۇبىرى يندۋستريالاندىرۋ باعدارلاماسىنا سايكەس تەگىن تارتىلعان. مەملەكەت قولداۋىنىڭ ارقاسىندا كاسىپورىن ەڭسەسىن تىكتەپ، اياعىنا نىق تۇرىپ ۇلگەردى. ناتيجە دە جامان ەمەس. ەندى جىلىنا 20 ميلليون دانا كۇيدىرگەن كىرپىش شىعارىلماق. زاۋىت ونىمىنە سۇرانىس تا اناعۇرلىم ارتىپ كەلەدى. بۇل زاماناۋي وزىق تەحنولوگيا مەن قاتار تىنىمسىز ەڭبەكتىڭ جەمىسى، دەيدى ماماندار.
