بيىل شەكارا ماڭىنداعى 140 اۋىلدا 290 نىسان ىسكە قوسىلادى

استانا. قازاقپارات - بيىل شەكارا ماڭىنداعى 140 اۋىلدا 290 نىسان ىسكە قوسىلادى. بۇل تۋرالى پرەمەر- مينيستر ءاليحان سمايىلوۆ «AMANAT» اتىنان سايلانعان ءماسليحات دەپۋتاتتارىنىڭ رەسپۋبليكالىق فورۋمىندا ءمالىم ەتتى، دەپ حابارلايدى قازاقپارات ءتىلشىسى.

«اۋىل - ەل بەسىگى» باعدارلاماسى شەڭبەرىندە وسى جىلى 900 اۋىلدا شامامەن 200 ميلليارد تەڭگەگە 1800-دەن استام جوبانى ىسكە اسىرۋ جوسپارلانىپ وتىر. شەكارالىق اۋدانداردىڭ ينفراقۇرىلىمىن دامىتۋ بويىنشا بيىل 140 اۋىلدا 290 نىسان ىسكە قوسىلادى. اۋىلدارعا بولىنەتىن قاراجاتتىڭ ءتيىمدى جانە ۋاقتىلى يگەرىلۋىن ءماسليحات دەپۋتاتتارى دا ەرەكشە نازاردا ۇستاۋى كەرەك. «اگلومەراتسيالاردى دامىتۋ تۋرالى» زاڭ استانا، الماتى، شىمكەنت، اقتوبە جانە قاراعاندى قالالارىنىڭ اينالاسىنداعى ەلدى مەكەندەردىڭ تۇراقتى دامۋىن قامتاماسىز ەتەدى. الماتى اگلومەراتسياسىندا «G4 City» جوباسىن ىسكە اسىرۋ ءۇشىن ارنايى ەكونوميكالىق ايماق قۇرىلدى»، - دەدى ول.

ۇكىمەت باسشىسى مونو جانە شاعىن قالالاردا 74 جوبانى ىسكە اسىرۋعا 35 ميلليارد تەڭگە بولىنگەنىن ەسكە سالدى.

«بۇل سوما جىل سايىن 50 ميلليارد تەڭگەگە دەيىن كوتەرىلەدى. سونىمەن قاتار، مونوقالالاردا يندۋستريالىق ايماقتاردى دامىتۋ ءۇشىن قاجەتتى ينفراقۇرىلىم سالىنىپ جاتىر. بيىل وڭىرلەردى دامىتۋعا رەسپۋبليكالىق بيۋدجەتتەن 7,2 تريلليون تەڭگەگە ترانسفەرتتەر ءبولىندى. جىل سوڭىنا دەيىن كەلەسى نەگىزگى كورسەتكىشتەرگە قول جەتكىزۋىمىز كەرەك. ەكونوميكانىڭ ناقتى ءوسىمى % 4,5-5، حالىقتىڭ ناقتى جالاقىسىنىڭ ءوسۋى -% 4,6 بولۋى كەرەك، ال جۇمىسسىزدىقتىڭ دەڭگەيى % 4,8- تەن اسپاۋى ءتيىس»، - دەدى ءاليحان سمايىلوۆ.

اۆتور:

ەسىمجان ناقتىباي