قازاقستاندا 14-16- قىركۇيەك كۇندەرى نايزاعاي ويناپ، بۇرشاق جاۋادى

نۇر-سۇلتان. قازاقپارات - سينوپتيكتەر 14-16- قىركۇيەك كۇندەرى قازاقستاندا قانداي اۋا رايى بولاتىنىنا بولجام جاسادى، دەپ حابارلايدى قازاقپارات قازگيدرومەتكە سىلتەمە جاساپ.

«رەسپۋبليكانىڭ وڭتۇستىك جارتىسىنا بەلسەندى بۇلتتى قۇيىن جىلجىپ كەلەدى. سوعان بايلانىستى كەي جەرلەردە نايزاعاي ويناپ، وتكىنشى جاڭبىر جاۋادى، قازاقستاننىڭ وڭتۇستىك، ورتالىق جانە وڭتۇستىك-شىعىس اۋداندارىندا بۇرشاق جاۋۋى مۇمكىن»، - دەلىنگەن حابارلامادا.

رەسەيدىڭ ەۋروپالىق بولىگىنىڭ سولتۇستىك-باتىس اۋداندارىنان شىققان باريكالىق جىرا اكەلەتىن اۋا اعىندارى قازاقستاننىڭ باتىس جانە سولتۇستىك وڭىرلەرىندە جەل اۋىتقىپ، جاڭبىر جاۋۋىنا سەبەپشى بولادى. اۋا تەمپەراتۋراسى كليماتتىق نورماعا جۋىق بولادى، تەك قازاقستاننىڭ شىعىسىندا قاتقاق بولۋى ىقتيمال.