استانا قالاسىنداعى 13 قۇرىلىس بويىنشا ءىس سوتتا قارالىپ جاتىر

استانا. قازاقپارات - ەلورداداعى قۇرىلىسى ءتيىستى رۇقساتتاردى تولىق الماستان باستالعان 90 نىساننىڭ 46 سىندا جۇمىستار جالعاسا بەرەدى، دەپ حابارلايدى قازاقپارات ءتىلشىسى.

بۇل جايىندا استانا قالاسىنىڭ قالالىق ورتا ساپاسى جانە باقىلاۋ باسقارماسىنىڭ رەداكسيا ساۋالىنا بەرگەن جاۋابىندا ايتىلعان.

«استانا قالاسى اۋماعىندا جىل باسىندا رۇقسات قۇجاتتارى جوق 90 قۇرىلىس نىسانىنىڭ قۇرىلىسى تىركەلدى. بۇگىنگى تاڭدا 90 نىساننىڭ 46 ۇيىمى قۇرىلىسقا بارلىق رۇقسات قۇجاتتارىن الدى. قالعان 44 قۇرىلىس نىسانى بويىنشا ەسكەرتۋلەردى جويۋ جانە بارلىق رۇقسات قۇجاتتارىن، ونىڭ ىشىندە ەكولوگيالىق قورىتىندىسىن الۋ پروتسەسى جۇرگىزىلۋدە»، - دەپ جازىلعان رەسمي مالىمەتتە.

2023 -جىلى استانا قالاسىنىڭ قالالىق ورتانى باقىلاۋ جانە ساپا باسقارماسى استانا قالاسىنىڭ مامانداندىرىلعان اۋدانارالىق ەكونوميكالىق سوتىنا قۇرىلىس- مونتاجداۋ جۇمىستارىن توقتاتا تۇرۋعا جانە بۇزۋعا 63 تالاپ ارىز جولداعان.

«ونىڭ ىشىندە 13 تالاپ ارىز سوتتا قارالۋدا. 50 تالاپ- ارىزدى قاناعاتتاندىرۋ تۋرالى شەشىم شىعارىلدى. سوتتاردىڭ 8 شەشىمى زاڭدى كۇشىنە ەنگەن جوق. 42 سوت شەشىمى استانا قالاسىنىڭ ادىلەت دەپارتامەنتىنىڭ ورىندالۋىندا»، - دەپ جازىلعان اكىمدىك جاۋابىندا.

بۇعان دەيىن سوت شەشىمىمەن بۇزۋعا جىبەرىلگەن 4 تۇرعىن ءۇيدىڭ قۇرىلىسى قايتا جالعاساتىن بولعانىن جازعان ەدىك.