ۇسىك، بۇرشاق، نايزاعاي: 13 وڭىردە ەسكەرتۋ جاريالاندى

استانا. قازاقپارات - «قازگيدرومەت» ر م ك 10-قىركۇيەكتە كۇن رايىنىڭ بۇزىلۋىنا بايلانىستى بىرنەشە وڭىردە ەسكەرتۋ جاريالادى، دەپ حابارلايدى قازاقپارات.

استانا قالاسىندا تۇندە جانە تاڭەرتەڭ تۇمان كۇتىلەدى.

كۇندىز ماڭعىستاۋ وبلىسىنىڭ سولتۇستىك- باتىسىندا، سولتۇستىك- شىعىسى مەن ورتالىعىندا قاتتى جاڭبىر، نايزاعاي، بۇرشاق كۇتىلەدى. جەلدىڭ ەكپىنى 23-28 م/س جەتۋى ىقتيمال.

تۇندە باتىس قازاقستان وبلىسىنىڭ سولتۇستىگىندە توپىراق بەتىندە 2 گرادۋس ۇسىك كۇتىلەدى.

تۇندە قىزىلوردا وبلىسىنىڭ شىعىسىندا، كۇندىز باتىسىندا نايزاعاي كۇتىلەدى. 10-11-قىركۇيەكتە ءوڭىر ورتالىعىندا، شىعىسى مەن وڭتۇستىگىندە توتەنشە ءورت قاۋپى ساقتالادى.

ۇلىتاۋ وبلىسىنىڭ وڭتۇستىگىندە ءورت تۇتانۋ قاۋپى اسا جوعارى.

كۇندىز اتىراۋ وبلىسىنىڭ باتىسىندا، وڭتۇستىگىندە قاتتى جاڭبىر، نايزاعاي بولجانادى. سولتۇستىك- باتىستان جەل سوعادى، كۇندىز نايزاعاي كەزىندە ەكپىنى 15-20 م/س قۇرايدى. ءوڭىردىڭ سولتۇستىك- باتىسىندا، سولتۇستىك- شىعىسىندا ءورت تۇتانۋ قاۋپى اسا جوعارى.

كۇندىز اقتوبە وبلىسىنىڭ باتىسىندا، سولتۇستىگىندە، وڭتۇستىگىندە نايزاعاي كۇتىلەدى. سولتۇستىك- باتىستان جەل سوعادى، كۇندىز ەكپىنى 15-20 م/س قۇرايدى.

تۇندە جانە تاڭەرتەڭ تۇركىستان وبلىسىنىڭ باتىسىندا، تاۋلى جانە تاۋ بوكتەرلى اۋداندارىندا نايزاعاي وينايدى. شىعىستان جەل سوعادى، وبلىستىڭ سولتۇستىگىندە، باتىسىندا، تاۋلى جانە تاۋ بوكتەرلى اۋداندارىندا كۇشى 15-20 م/س قۇرايدى.

شىمكەنت قالاسىندا تۇندە نايزاعاي ويناپ، شىعىستان جەل سوعادى، تۇندە ەكپىنى 15-20 م/س قۇرايدى.

تۇندە اقمولا وبلىسىنىڭ سولتۇستىگىندە قاتتى جاڭبىر جاۋىپ، تۇندە - وبلىستىڭ سولتۇستىگىندە، وڭتۇستىگىندە، باتىسىندا، كۇندىز سولتۇستىگىندە نايزاعاي كۇتىلەدى. تۇندە جانە تاڭەرتەڭ ءوڭىردىڭ سولتۇستىگى مەن شىعىسىندا تۇمان بولجانادى. جەلدىڭ جىلدامدىعى 15-20 م/س قۇرايدى.

تۇندە سولتۇستىك قازاقستان وبلىسىنىڭ باسىم بولىگىندە جاڭبىر جاۋىپ، ءوڭىردىڭ باتىسىندا قاتتى جاڭبىر كۇتىلەدى. وبلىستىڭ وڭتۇستىگىندە، سولتۇستىگىندە، شىعىسىندا نايزاعاي ويناپ، وڭتۇستىك- شىعىستا تۇمان بولجانادى. كۇندىز شىعىستا بۇرشاق ءتۇسۋى ىقتيمال. جەلدىڭ ەكپىنى 15-20 م/س قۇرايدى.

قوستاناي وبلىسىنىڭ باتىسىندا، سولتۇستىگى مەن شىعىسىندا نايزاعاي ويناپ، كۇندىز سولتۇستىك پەن باتىستا بۇرشاق كۇتىلەدى. وڭتۇستىك- شىعىستان جەل سوعادى، ەكپىنى - 15-20 م/س.

كۇندىز پاۆلودار وبلىسىنىڭ سولتۇستىگى مەن باتىسىندا نايزاعاي كۇتىلەدى. ءوڭىردىڭ وڭتۇستىگىندە ءورت تۇتانۋ قاۋپى جوعارى.