تۇركيادان قازاقستاننىڭ 13 ازاماتى مەن ولاردىڭ وتباسى مۇشەلەرى ۇشاقپەن ەلگە جىبەرىلدى
«17-اقپاندا قازاقستان ەلشىلىگىنىڭ ۇيىمداستىرۋىمەن تۇركياداعى جەر سىلكىنىسى بولعان ايماقتاردان قازاقستاننىڭ 13 ازاماتى مەن ولاردىڭ وتباسى مۇشەلەرى جانە تۇركيانىڭ 2 ازاماتى قازاقستاننان كەلگەن ۇشاقپەن الماتىعا قايتارىلدى»، - دەپ جازدى تۇرىك ەلىندەگى ديپلوماتيالىق وكىلدىگىمىز Facebook-تە.
17-اقپاندا قازاقستاننىڭ 55 توننا گۋمانيتارلىق جۇگى تيەلگەن بورت تۇركيانىڭ گازيانتەپ قالاسىنا قونعانىن بۇعان دەيىن جازعان بولاتىنبىز.
ءوز كەزەگىندە تۇركيانىڭ قازاقستانداعى ەلشىلىگى Facebook-تەگى پاراقشاسىندا قازاق ەلى جيناعان قايىرىمدىلىق قاراجاتىنىڭ سوماسى 4 ميلليون دوللاردان اسقانىن جازدى.
مالىمەتكە سۇيەنسەك، جەر سىلكىنىسىنەن زارداپ شەككەندەرگە كومەك رەتىندە 16-17-اقپان كۇندەرى 411622 ا ق ش دوللارى جينالعان. ولار تۇركيانىڭ توتەنشە جاعدايلار جونىندەگى باسقارماسىنىڭ (AFAD) شوتىنا اۋدارىلدى. وسىلايشا، قازاقستان رەسپۋبليكاسىنان اۋدارىلعان قايىرىمدىلىق قاراجاتىنىڭ جالپى سوماسى 4028466 ا ق ش دوللارىن قۇراپ وتىر.
تۇركياداعى ءزىلزالادان زارداپ شەككەندەرگە قازاقستاندىقتار جيناعان قاراجات كولەمى 16-اقپان كۇنى 3,6 ميلليون دوللار بولعان ەدى.
ايتا كەتەيىك، پرەزيدەنت قاسىم-جومارت توقايەۆتىڭ تاپسىرماسىمەن تۇركيا رەسپۋبليكاسىنا گۋمانيتارلىق كومەك رەتىندە 1 ميلليون دوللار بولىنگەن ەدى.
بۇگىنگە دەيىن قازاقستاندىق قۇتقارۋشىلار تۇركيادا ۇيىندىلەر استىنان 7 ادامدى قۇتقارىپ، 88 ادامنىڭ ءمايىتىن الىپ شىقتى.
اتالعان ەلدە 7 بالدان اساتىن جويقىن جەر سىلكىنىسى 6-اقپاندا بولدى. ءزىلزالادان كەيىن 4 مىڭنان استام افتەرشوك تىركەلدى.
سوڭعى مالىمەتكە سايكەس، تابيعي اپات سالدارىنان قازا بولعاندار سانى 36,1 مىڭنان استى، 108 مىڭنان استامى زارداپ شەكتى.
تەربەلىستى تۇرىك ەلىمەن شەكارالاس ورنالاسقان سيريا، ليۆان، يراك، كيپر حالقى سەزىندى.
