بيىل رامازان ايى 13-ساۋىردە باستالادى - فوتو
ونلاين رەجيمدە وتكەن ماجىلىسكە نايب ءمۇفتي ەرشات اعىباي ۇلى، ق م د ب اپپارات باسشىسى عىلىمبەك جادىگەر ۇلى، ءبولىم باسشىلارى مەن باس يمامدار قاتىستى. كەڭەيتىلگەن ءماجىلىس بارىسىندا 8 ماسەلە قارالدى.
ءتورالقا ماجىلىسىندە ق م د ب شاريعات جانە ءپاتۋا ءبولىمىنىڭ مەڭگەرۋشىسى سانسىزباي قۇربان ۇلى رامازان ايىنىڭ باستالۋى، قادىر ءتۇنى جانە ورازا ايت كۇندەرى جايلى باياندادى. بيىل رامازان ايى 13-ساۋىردە باستالىپ، 12-مامىردا اياقتالادى. رامازان ايى 30 كۇن بولادى. 13-مامىر - ورازا ايت كۇنى. 8-مامىردان 9-مامىرعا قاراعان ءتۇن - قادىر ءتۇنى. باس ءمۇفتي جيىنعا قاتىسۋشىلاردىڭ ۇسىنىس- تىلەكتەرىن تىڭداپ، جاۋاپتى ءبولىم باسشىلارى مەن يمامدارعا ناقتى تاپسىرمالار جۇكتەدى.
«ساناۋلى كۇندەردەن سوڭ قاسيەتتى رامازان ايى كىرەدى. مۇسىلمان ۇمبەتى ءۇشىن رامازان - سونداي ءبىر ەرەكشە اي. ەلىمىزدەگى قانشاما باۋىرلارىمىز وسى ايدى كۇتەدى، ورازاسىن ۇستايدى. مەيىرىم مەن كەشىرىمگە، ساۋاپقا تولى ايدى ادەتتەگىدەي ءوز دەڭگەيىندە وتكىزۋدى اللا ءناسىپ ەتسىن! قازىرگى جاعدايدى ەسكەرە وتىرىپ، ەڭ باستىسى تازالىق پەن ءتارتىپ جاعىنا كوڭىل بولسەك. وسى ايدا مەيلىنشە قايىرىمدى ىستەردى كوبىرەك اتقارۋعا شاقىرامىن. جاماعاتتىڭ ىڭعايىنا قاراي ۋاقىتىن بەلگىلەپ ونلاين دارىستەر، قۇران ۇيرەتۋ ساباقتارىن وتكىزۋدى جالعاستىرۋىمىز كەرەك. حالىققا پايدالى ۋاعىز تاراتۋ ماقساتىندا تىكەلەي ەفيرلەر ۇيىمداستىرىپ، مۇمكىندىگى جوق جاندارعا اۋىزاشار پاكەتتەرىن جەتكىزۋ جاعىن قولعا الۋدى تاپسىرامىن»، - دەدى باس ءمۇفتي ناۋرىزباي قاجى تاعان ۇلى.
اۆتور: اياۋلىم التىنبەك
