كوروناۆيرۋسقا بايلانىستى جابىلعان الەم مۋزەيلەرىنىڭ 13 پايىزى قايتادان اشىلماۋى مۇمكىن

نۇر-سۇلتان. قازاقپارات - كەشە حالىقارالىق مۋزەي كۇنىنە وراي UNESCO مەن حالىقارالىق مۋزەيلەر كەڭەسى (يكوم) تالداۋ جۇرگىزىپ، مۇراجايلاردىڭ كوروناۆيرۋس پاندەمياسىنان قاتتى زارداپ شەككەنىن راستادى، دەپ جازادى Unesco.org.

بۇگىنگى تاڭدا مۇراجايلاردىڭ 90 پايىزى نەمەسە 85 مىڭنان استام مۋزەي جابىلعان. ونىڭ ۇستىنە افريكا مەن ارالداعى دامۋشى ەلدەردە مۋزەيلەردىڭ 5 پايىزى عانا ءوز اۋديتورياسىنا ونلاين كونتەنت ۇسىنا العان.

بۇكىل الەمدەگى مۋزەيلەردىڭ 13 پايىزى ەسىگىن قايتا اشپاۋى مۇمكىن. مۇراجاي قىزمەتكەرلەرى قاتىسقان ەكى زەرتتەۋ دە كوروناۆيرۋس پاندەمياسىنىڭ مۋزەي ىسىنە اسەرىن باعالاۋدى ماقسات ەتتى.

ولار بۇل سالانىڭ الەمدىك قاۋىپ-قاتەرگە قالاي بەيىمدەلگەنىن جانە ول اياقتالعاننان كەيىن مۋزەيدى قولداۋ ادىستەرى قانداي بولاتىنىن انىقتاۋعا تىرىستى.

«مۇراجايلار قوعام ورنىقتىلىعىن قامتاماسىز ەتۋدە جەتەكشى ءرول اتقارادى، - دەيدى UNESCO باس ديرەكتورى ودرە ازۋلە. - ءبىز ولاردىڭ بۇل داعدارىسپەن كۇرەستە جەڭىپ شىعۋىنا جانە اۋديتوريامەن بايلانىسىن ۇزبەۋىنە كومەكتەسۋىمىز كەرەك. بۇل پاندەميا ادامزاتتىڭ جارتىسىنا سيفرلىق تەحنولوگيالار قولجەتىمدى ەمەستىگىن ەسىمىزگە سالدى. ءبىز ەڭ ءالسىز جانە وقشاۋدا وتىرعان جانداردىڭ مادەنيەتتەن قول ۇزبەۋى ءۇشىن جۇمىس ىستەۋىمىز كەرەك».

UNESCO مامىر ايىنىڭ ورتاسىندا ResiliArt قوزعالىسى اياسىندا مۋزەيلەرگە ارنالعان پىكىرتالاستى باستاعان ەدى. العاشقى ءۇش ديسكۋسسيا يبەر-امەريكالىق وڭىردەگى جاعدايدى جانە مۋزەي مەن وسى ءىستىڭ ماماندارىن قولداۋ ستراتەگياسىن ءسوز ەتەدى. يكوم جۇرگىزگەن زەرتتەۋ كورەرمەنىنەن ايىرىلعان مۋزەيلەردىڭ تابىسى ازاياتىنىن كورسەتىپ بەردى.

بۇل سونداي-اق مۋزەيمەن بايلانىستى ماماندىقتارعا دا اسەر ەتۋى مۇمكىن. UNESCO مەن يكوم تاياۋدا اتالمىش زەرتتەۋدىڭ ناتيجەسىن جاريالايدى.