قىراندى باپتاۋ - 13 جاسار بۇركىتشى قۇپيالارىمەن ءبولىستى - فوتو
قازاقتاردىڭ ومىرىندە اڭشى قۇستار - بۇركىتتەرمەن اڭعا شىعۋ ەرەكشە ماڭىزعا يە. حالىق سپورتىنىڭ وسى ءبىر ەرەكشە ءتۇرى كوپ قولدانىلماسا دا، بۇل ءداستۇر ءالى ساقتالىپ كەلەدى جانە تاريح قويناۋىنا ەنىپ كەتكەن جوق.
مۇنىڭ بارلىعى اتا-باباسىنان اڭشىلىق ءداستۇردى ساقتاپ كەلە جاتقان بۇركىتشىلەردىڭ ارقاسى. باۋىرجان سەيىتجان وتباسى - وسىنىڭ ايقىن دالەلى.
باۋىرجاننىڭ ايان، الماس، بەكاسىل جانە بەكسۇلتان اتتى ءتورت ۇلى بار. تاياۋدا ءۇيدىڭ ءۇشىنشى ۇلى بەكاسىل - قازاقستاننىڭ تۇپكىر-تۇپكىرىنەن جينالعان بۇركىتشى- شەبەرلەردىڭ باسىن قوسقان «قىران - 2018» تۋرنيرىندە جەڭىمپاز اتاندى.
«بۇل مەن ءۇشىن ۇلكەن جەتىستىگىم. وسى داستۇرگە باۋلىپ، باتاسىن بەرگەن اتاما راحمەت. ءبىزدىڭ وتباسىمىزدا بارلىعى اڭشىلىقپەن اينالىسادى. اركىمنىڭ ءوز قۇسى بار. مەنىڭ بۇركىتىمنىڭ اتى ءحانتاڭىر. ءىنىم بەكسۇلتان ءالى كىشكەنتاي، سوندىقتان ول قارشىعا كوكجەندەتپەن اڭعا شىعادى»، - دەدى جاس چەمپيون.
قازىر بەكاسىل 13 جاستا. ول الماتى وبلىسى ەڭبەكشىقازاق اۋدانى سوگەت اۋىلىنداعى و. جاندوسوۆ اتىنداعى ورتا مەكتەپتىڭ 7-سىنىپ وقۋشىسى. ول سۇيىكتى كاسىبىمەن سەگىز جاسىنان اينالىسا باستاعان.
«بۇل ىستە ۇنەمى شەبەرلىكتى قايراپ، ءوزىڭ ءۇشىن جاڭا نارسە ۇيرەنىپ وتىرۋ ماڭىزدى. ەڭ باستىسى - ءوز قىرانىڭا ماحابباتپەن قاراپ، ونى ايالاي ءبىلۋ، ونى دۇرىس تاماقتاندىرىپ، يشارانى ۇيرەتۋ كەرەك. سەبەبى، يەن دالادا ونىمەن بىرگە جالعىز قالاسىڭ»، - دەپ قۇپياسىمەن ءبولىستى جاس بۇركىتشى.
ايتا كەتەيىك، بەكاسىل بۇل اۋەستىكتەن بولەك ەكى جىلدان بەرى قازاقشا كۇرەسكە قاتىسادى. مەكتەپتە دە ساباقتى جاقسى وقيتىنىمەن كوزگە تۇسكەن. الايدا، ازىرگە بولاشاق ماماندىعىن تاڭداپ ۇلگەرمەگەن.
«ارينە، تەك قۇسپەن ءومىر سۇرە المايسىڭ. سوندىقتان بولاشاقتا سۇرانىسقا يە ماماندىقتى يگەرۋ قاجەت. قۇسپەن اڭشىلىق جاساۋعا كەلەر بولساق - بۇل ءبىزدىڭ حالىقتىڭ ۇلتتىق ءداستۇرى. ءبىز ونى ساقتاپ قالۋىمىز كەرەك. قازىر ءبىزدىڭ ەلىمىزدە قازاق حالقىنىڭ مادەني-رۋحاني مۇراسىن جاڭعىرتۋعا كوپ كوڭىل بولىنەتىنى قۋانتادى»، - دەدى چەمپيوننىڭ اكەسى باۋىرجان سەيىتجان.
ەسكە سالا كەتسەك، 8 جاسىنان قولىنا قىران قوندىرىپ، بۇركىت باپتاعان الماتى وبلىسى ەڭبەكشىقازاق اۋدانىنىڭ تۇرعىنى، 13 جاستاعى بەكسۇلتان سەيىتجان تۋرنيردىڭ باس جۇلدەسىن جەڭىپ العاندىعى تۋرالى حابارلاعان بولاتىنبىز.
