الماتىعا 13 جاستاعى جەتكىنشەك اكەسىن ىزدەپ كەلدى - ءى ءى د
بۇل تۋرالى بۇگىن الماتى ق. ءى ءى د باسپا ءسوز قىزمەتىنەن حابارلادى.
بوستاندىق اۋدانى ءى ءى ب يۋۆەنالدى پوليتسياسىنىڭ ينسپەكتورلارى 13 جاستاعى گريگوري ساليدى ك. بايسەيىتوۆا كوشەسىنىڭ بويىندا ورىندىقتا ۇيىقتاپ جاتقان جەرىنەن تاۋىپ الىپتى.
«وياتىپ، اڭگىمەلەسكەنىمىزدە ول ءوزىنىڭ اۋىر تاعدىرى جايلى ايتىپ بەردى.
ول الماتىعا قاپشاعاي قالاسىنان كەلىپتى. تۋعان اكەسىن ىزدەپ ءجۇر ەكەن.
ونى كورمەگەلى 7 جىل بولعان. ايتۋىنشا، اكە-شەشەسى اجىراسىپ كەتكەن. بۇعان اناسىنىڭ ىشىمدىككە سالىنىپ كەتۋى سەبەپ بولعان كورىنەدى. گريگوريدىڭ ءوزى دە وسى سەبەپتەن تۋعان ءۇيىن تاستاپ، الماتىعا كەلگەن. ەندى ول اكەسىمەن بىرگە بولعىسى كەلەتىندىگىن ايتىپ وتىر»، - دەدى ءوز سوزىندە الماتى ق. ءى ءى د اكىمشىلىك پوليتسياسى باسقارماسىنىڭ يۋۆەنالدى پوليتسيا ءبولىمىنىڭ باستىعى لەيلا الىپبايەۆا.
گريگوريدىڭ سوزىنە قاراعاندا ونىڭ الماتىعا كەلىپ، دالادا تۇنەپ جۇرگەنىنە بىرنەشە كۇننىڭ ءجۇزى بولىپتى. ماماسىنىڭ وعان ءالى ىزدەۋ جاريالاماعانىنا سەنىمدى. «انامنىڭ مەنىمەن ءىسى جوق»، - دەيدى ول.
ازىرگە كامەلەتكە تولماعان جاس بالا ءوز بەتىمەن اكەسىن ىزدەپ تابا الماعان. ونىڭ ۇستىنە اكەسى تۋرالى جارىتىپ ەشتەڭە بىلمەيدى. ەگەر اكەسى ءوزىن ۇلىنىڭ ىزدەپ جۇرگەنىن ەستيتىن بولسا، گريگوريدىڭ وعان ايتار ءسوزى دايىن: «اكە، مەن ءسىزدى ىزدەپ ءجۇرمىن! كەلىڭىزشى وتىنەمىن! مەن كۇتەمىن»!
بوستاندىق اۋدانىنىڭ پوليتسيا قىزمەتكەرلەرى ازىرگە گريگوريدى كامەلەتكە تولماعان بالالاردى وڭالتۋ ورتالىعىنا ورنالاستىرىپ، اكەسىن ىزدەستىرۋگە كىرىستى. دەگەنمەن، ءتارتىپ ساقشىلارى ءبىرىنشى كەزەكتە جۇرتشىلىققا ءۇمىت ارتۋدا. ەگەر گريگوري ساليدى تانيتىن نەمەسە ونىڭ اكەسى جايلى بىلەتىن ادامدار بولاتىن بولسا، الماتى قالاسىنداعى كامەلەتكە تولماعان بالالاردى وڭالتۋ ورتالىعىنا حابارلاسۋلارىن سۇرايدى.
اۆتور: جاپپاربەرگەن ايبوتا
