بيىل سولتۇستىك قازاقستانعا 138 قانداسىمىزدى كوشىرۋ جوسپارلانىپ وتىر
وڭىرلىك كوممۋنيكاتسيالار قىزمەتىندە سقو جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى رينات ەلجاسوۆ ازاماتتاردىڭ جەكەلەگەن ساناتتارىنا مەملەكەتتىك قولداۋ كورسەتۋ بويىنشا اتقارىلىپ جاتقان جۇمىسپەن تانىستىردى.
س ق و ازاماتتاردى جۇمىس كۇشى ارتىق وڭىرلەردەن كوشىرۋ بويىنشا باعدارلاماعا بەلسەندى قاتىسىپ كەلەدى.
ماماننىڭ ايتۋىنشا، بىلتىر كۆوتاعا سايكەس 2556 ادام نەمەسە 681 وتباسى جۇمىس كۇشى ارتىق وڭىرلەردەن كەلدى.
«ەڭبەككە قابىلەتتى 974 ادامنىڭ 820 سى نەمەسە %84 جۇمىسپەن قامتىلدى، ونىڭ ىشىندە تۇراقتى جۇمىس ورىندارىنا - 652 ادام قابىلدانسا، كاسىپكەرلىكپەن 168 ادام اينالىسىپ جاتىر، ونىڭ 111 ءى 136 ميلليون تەڭگەگە وتەۋسىز گرانتتار مەن كرەديتتەر الدى.
كەلگەندەردىڭ ىشىندە 1252 - بالا، 66 ستۋدەنت جانە 63 زەينەتكەر بار. دەكرەتتىك دەمالىستا 201 ايەل وتىر»، - دەيدى رينات ەلجاسوۆ.
بيىل دا بۇل باعدارلاما جالعاسادى.
«قازىرگى ۋاقىتتا ولاردى قونىستاندىرۋ ءۇشىن ەلدى مەكەندەردىڭ تىزبەسى بەكىتىلدى. كەلگەن ازاماتتارعا ماتەريالدىق كومەك كورسەتۋ، ونىڭ ىشىندە كوشۋگە جانە تۇرعىن ءۇيدى جالعا الۋعا سۋبسيديالار تولەۋ كوزدەلگەن.
سونداي-اق، بيىل تۇرعىن ءۇي ساتىپ الۋ، سالۋ ءۇشىن ەكونوميكالىق ۇتقىرلىق سەرتيفيكاتىن نەمەسە 4 ميلليون تەڭگەگە دەيىنگى مولشەردەگى يپوتەكالىق تۇرعىن ءۇي قارىزدارى بويىنشا باستاپقى جارنانى ۇسىنۋ كوزدەلگەن»، - دەيدى باسقارما باسشىسى.
جىل باسىنان بەرى وبلىسقا جۇمىس كۇشى ارتىق وڭىرلەردەن 148 وتباسى - 483 ادام قونىس اۋداردى. كوشىپ كەلگەندەردىڭ %31 استانا قالاسىنان، %26 تۇركىستان وبلىسىنان جانە %11 شىمكەنت قالاسىنان كەلگەن.
قانداستاردىڭ 25 وتباسى نەمەسە 48 ادام كوشىپ كەلدى. سونىڭ ىشىندە رەسەيدەن 18 وتباسى - 24 ادام، موڭعوليادان 3 وتباسى - 13 ادام، يراننان 2 وتباسى - 6 ادام، وزبەكستاننان 4 مۇشەسى بار ءبىر وتباسى جانە قىرعىزستاننان ءبىر ادام قونىس اۋداردى.
«ەڭبەك جانە الەۋمەتتىك قورعاۋ مينيسترلىگىمەن بىرلەسىپ، 2023-2025-جىلدارعا ارنالعان قونىس اۋدارۋدى ىنتالاندىرۋ جونىندەگى جول كارتاسى ازىرلەندى.
وسى كارتا اياسىندا 3 جىل ىشىندە مەملەكەتتىك قولداۋ شارالارىن كورسەتە وتىرىپ، 8 مىڭنان استام ادامدى كوشىرۋ جوسپارلانعان. وسى جىلدار ىشىندە بارلىعى 3 مىڭنان استام جاڭا جۇمىس ورنىن قۇرا وتىرىپ، 11 ينۆەستيتسيالىق جوبانى ىسكە اسىرۋ مىندەتى تۇر. وڭىردە كادرلارعا قاجەتتىلىك بار.
بۇل جۇمىس ورىندارىنا جەرگىلىكتى تۇرعىندار دا جۇمىسقا ورنالاسا الادى، ولارعا دا جۇمىس بەرىلەدى»، - دەيدى رينات ەلجاسوۆ.
