يتتەرىن تۇمىلدىرىقسىز سەرۋەنگە شىعارعان 1300 دەن استام استانالىققا ايىپپۇل سالىندى

استانا قالاسى اۋىلشارۋاشىلىق باسقارماسىنىڭ باسشىسى اسەت قۇرمانعاليەۆ حالىق قالاۋلىلارىن ءۇي جانۋارلارىن استانا قالاسىندا ۇستاۋ بويىنشا ۆەدومستۆودا بەكىتىلگەن ەرەجەلەرمەن تانىستىردى.
- جىل باسىنان بەرى ءۇي جانۋارلارىن ۇستاۋ ەرەجەلەرىن بۇزعانى ءۇشىن 1329 ادام اكىمشىلىك جازاعا تارتىلىپ، جالپى سوماسى 700 مىڭ تەڭگە كولەمىندە ايىپپۇل تولەدى. زەرتتەۋ ناتيجەسى كورسەتكەندەي، نەگىزىنەن يتتەردى تۇمىلدىرىقسىز سىرتقا شىعارۋ سەكىلدى بۇزۋشىلىقتار كوپتەپ تىركەلۋدە. يەلەرىنىڭ جانۋارلارعا دۇرىس قاراماۋى سالدارىنان قالادا قاراۋسىز قالعان ءۇي جانۋارلارى كوبەيۋدە، - دەدى. ءا. قۇرمانعاليەۆ.
ونىڭ ايتۋىنشا، استانادا ءۇي جانۋارلارىن شىعارۋعا، سەرۋەندەتۋگە لايىقتالعان ارنايى ورىن جوق. حالىق قالاۋلىلارى وسى سۇراقتاردى تۇرعىندارمەن، پ ي ك مۇشەلەرىمەن، ەلوردالىق كينولوگيا قىزمەتتەرىمەن بىرلەسە وتىرىپ شەشۋگە ۇسىنىس جاسادى.
قالالىق ءماسليحاتتىڭ حاتشىسى سانسىزباي ەسىلوۆ ءۇي جانۋارلارى يەلەرىنەن تازالىق ساقتاۋدى، قاۋىپسىزدىك ەرەجەلەرىن ساقتاۋدى تالاپ ەتۋ كەرەكتىگىن باسا ايتتى.