130 جاستاعى اجە رەسمي تۇردە ەڭ قارت ادام دەپ تانىلدى

وزبەكستاندا 130 جاستاعى حۋۆايدو اجە رەسمي تۇردە ەلدەگى ەڭ قارت ادام دەپ تانىلدى، - دەپ حابارلايدى Massaget.kz ءتىلشىسى Gazeta.uz-عا سىلتەمە جاساپ.

باسىلىم دەرەگىنشە، فەرعانا وبلىسى بۋۆايدا اۋدانىنداعى «قوراقۇم» ماحاللاسىندا تۇراتىن حۋۆايدو ۋماروۆا 1895 -جىلعى 1-قاڭتاردا دۇنيەگە كەلگەن. بۇل دەرەكتى سوت ونىڭ ۇيىندە وتكەن وتىرىستا رەسمي تۇردە بەكىتكەن.

«ەندى حۋۆايدو اجە وزبەكستانداعى ەڭ قارت ايەل رەتىندە رەسمي تانىلدى»، - دەلىنگەن ۆەدومستۆو حابارلاماسىندا.

بۇعان دەيىن اۋداندىق ادىلەت ءبولىمى ونىڭ تۋۋ دەرەگى تىركەلمەگەنىن انىقتاپ، سوتقا جۇگىنگەن ەدى. كوكاند قالاسىنىڭ اۋدانارالىق ازاماتتىق ىستەر سوتى ءوتىنىشتى قاناعاتتاندىردى.

تۋىستارى حۋۆايدو اجەنى الەمنىڭ ەڭ قارت تۇرعىنى رەتىندە گيننەس رەكوردتار كىتابىنا ەنگىزۋگە ءوتىنىش بەرۋدى جوسپارلاعان. ءبىراق 1999 -جىلى بەرىلگەن پاسپورتىندا تۋعان كۇنى كورسەتىلمەگەندىكتەن، ءراسىم كەيىنگە قالعان. ەندى جاسى رەسمي راستالعان سوڭ، مۇنداي مۇمكىندىك بار ەكەنىن مينيسترلىك اتاپ ءوتتى.

ايتا كەتەيىك، بيىل تامىزدا گيننەس رەكوردتار كىتابى الەمدەگى ەڭ قارت ادام رەتىندە 116 جاستاعى ۇلى بريتانيا تۇرعىنى ەتەل كاتەرحەمدى اتاعان بولاتىن. ول ۇزاق عۇمىرىندا ءۇندىستاندا ءومىر ءسۇرىپ، ەكى قىز تاربيەلەگەن، سۇيىكتى جارىنان 1976 -جىلى ايىرىلعان. كەيىن قىزدارى دا قايتىس بولعان.