1,3 ميلليون تەڭگە قارىزى بار جۇرگىزۋشى انىقتالدى
تۇركىستان. KAZINFORM - وڭىردە جول ءتارتىبىن بۇزۋشى جۇرگىزۋشىلەرگە قاتىستى اۋقىمدى تەكسەرۋ باستالدى.
تولە بي اۋدانىندا «قورعاۋ» جۇيەسى ارقىلى 1,3 ميلليون تەڭگەدەن استام بەرەشەگى بار جۇرگىزۋشى انىقتالدى. لەڭگىر قالاسىنىڭ كوشەلەرىنىڭ بىرىندە Mercedes-Benz كولىگىن توقتاتقان ءتارتىپ ساقشىلارى جۇرگىزۋشىنى جاۋاپقا تارتىپ، تۇسىندىرمە جۇمىستارىن جۇرگىزدى.
پوليتسەيلەردىڭ ايتۋىنشا، «قورعاۋ» باعدارلاماسى «نولدىك توزىمدىلىك» قاعيداتى بويىنشا جۇمىس ىستەيدى جانە تاۋلىك بويى قوعامدىق ءتارتىپتى باقىلاۋعا مۇمكىندىك بەرەدى.
- قازىرگى ۋاقىتتا تۇركىستان وبلىسى بويىنشا جول-كولىك وقيعالارىن ازايتۋ جانە جۇرگىزۋشىلەردىڭ ءتارتىبىن باقىلاۋ ماقساتىندا «قاۋىپسىز جول» جەدەل-پروفيلاكتيكالىق ءىس-شاراسى جۇرگىزىلىپ جاتىر. ءىس-شارانىڭ باستى ماقساتى - ازاماتتاردىڭ قاۋىپسىزدىگىن قامتاماسىز ەتۋ جانە جولداعى ءتارتىپتى نىعايتۋ، - دەلىنگەن، تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى تاراتقان اقپاراتتا.
