قازاقستاندىقتار قادىر ءتۇنىن شىلدەنىڭ 13 ىنەن 14 ىنە قاراعان ءتۇنى كۇتەدى
بۇل تۋرالى بۇگىن قازاقستان مۇسىلماندارى ءدىني باسقارماسىنىڭ نايب ءمۇفتيى، «نۇر استانا» ورتالىق مەشىتىنىڭ باس يمامى ناۋرىزباي قاجى تاعان ۇلى ءمالىم ەتتى.
«اللا تاعالا رامازان ايى جونىندە قاسيەتتى قۇراندا ارنايى سۇرە ءتۇسىردى. ول سۇرەدە قادىر ءتۇنى جايىندا ايتتى. اللا تاعالا قۇران كارىمدە: «ءبىز قاسيەتتى قۇراندى قادىر تۇنىندە تۇسىردىك. بۇل ءتۇن مىڭ ايدان دا قايىرلى، دەي وتىرىپ، قادىر ءتۇنىنىڭ ماڭىزدىلىعىن بىزگە بايان ەتتى. بۇل ءتۇننىڭ ماڭىزدىلىعى سونشالىق، وسى ءتۇننىڭ قۇرمەتىنە بۇكىل پەرىشتەلەر جەرگە ءتۇسىپ، اللانىڭ ءاربىر پەندەسىنىڭ تىلەگىنە «ءامين» دەيدى ەكەن. تاڭ اتقانعا دەيىن پەرىشتەلەر اللانىڭ قۇلدارىنا تىلەكشى بولىپ تۇرادى. بيىل قادىر ءتۇنى شىلدە ايىنىڭ 13 ىنەن 14 ىنە قاراعان تۇنگە تۇسپا-تۇس كەلەدى. اللا بۇيىرتسا، 13- شىلدەدەن 14- شىلدەگە قاراعان ءتۇنى قادىر ءتۇنىن قارسى الىپ وتكىزەمىز»، - دەدى ناۋرىزباي قاجى تاعان ۇلى.
اۆتور: مارلان جيەمباي
