اقشا، قارۋ، ادام ولتىرۋگە وقتالۋ: قىلمىستىق توپتىڭ 12 ادامى قاماۋعا الىندى

استانا. قازاقپارات – 23-تامىز كۇنى ىشكى ىستەر مينيسترلىگى ۇلتتىق قاۋىپسىزدىك كوميتەتىمەن بىرلەسىپ جانە پروكۋراتۋرانىڭ ۇيلەستىرۋىمەن استانا جانە قاراعاندى قالالارىنىڭ اۋماعىندا قاراعاندى وبلىسىنداعى كريمينوگەندىك جاعدايعا تەرىس اسەر ەتەتىن قىلمىستىق توپتى قۇرىقتاۋ بويىنشا كەڭ اۋقىمدى ارنايى وپەراتسيا جۇرگىزدى.

قازاقپارات بۇل تۋرالى Polisia.kz-كە سىلتەمە جاساپ حابارلايدى.

توپ مۇشەلەرىنىڭ تاۋ-كەن ءوندىرۋشى كومپانيالاردىڭ ءبىرىنىڭ تاۋارلىق- ماتەريالدىق قۇندىلىقتارىن ۇرلاۋعا، ەسىرتكى مەن اتىس قارۋىن ساقتاۋعا، سونداي-اق 2022 -جىلى قىلمىستىق تەكەتىرەس كەزىندە قاراعاندى تۇرعىنىن ولتىرۋگە وقتالۋ فاكتىسىنە قاتىسى بار ەكەنى انىقتالدى. وسى قاستاندىقتى جاساماق بولعان توپتىڭ بولجامدى «كيللەرى» كورشى مەملەكەتتىڭ اۋماعىندا ۇستالدى.

«ءتىنتۋ بويىنشا 70 ءىس-شارا وتكىزىلدى، سونىڭ ناتيجەسىندە 9 قارۋ، 400 گە جۋىق وق-ءدارى، پىشاقتار، راديوستانتسيالار، ۇلكەن كولەمدە اقشا جانە باسقا دا زاتتاي دالەلدەمەلەر تابىلىپ، تاركىلەندى.

پوليتسياعا 28 ادام جەتكىزىلدى، ونىڭ ىشىندە توپتىڭ 12 بەلسەندى مۇشەسى ۋاقىتشا ۇستاۋ يزولياتورىنا قامالدى.

قىلمىستىق كودەكستىڭ بىرنەشە بابى بويىنشا سوتقا دەيىنگى تەرگەپ- تەكسەرۋ جۇرگىزىلۋدە، ءتيىستى ساراپتامالار تاعايىندالدى»، - دەدى ءى ءى م ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.