«بولاشاق» تۇلەگى تۋعان اۋىلىنا 12 ميلليون تەڭگەنىڭ لابوراتورياسىن سىيعا تارتتى
ءتاتتى اۋىلدىق وكرۋگىندە تۋعان ءابۋتالىپ ءمۇتالى ءوزىنىڭ كىندىك قانى تامعان اۋىلىنداعى №13 م. مامەتوۆا اتىنداعى ورتا مەكتەپكە قۇنى 12 ميلليون تەڭگەنى قۇرايتىن لابوراتوريانى سىيعا تارتتى. كاسىبىنەن ءناسىبىن تاپقان ول «بولاشاق» باعدارلاماسى اياسىندا ا ق ش - تا وقىپ، ەلگە كەلگەن سوڭ STEM Academia» كومپانياسىنىڭ نەگىزىن قالاعان.
«STEM» الەمدىك جۇيەسى باعدارلامالاۋ جانە قۇراستىرۋ داعدىلارىن دامىتۋعا مۇمكىندىك سىيلايدى. سونىمەن قاتار بۇل جۇيە وقۋشىلاردىڭ عىلىمي- تەحنيكالىق سالاعا دەگەن قىزىعۋشىلىقتارىن قولداۋ ماقساتىندا روبوتوتەحنيكاسىن شىعارماشىلىق جانە سىني قولدانۋعا باعىت- باعدار بەرەدى. ءابۋتالىپ ءمۇتالىنىڭ باستاماسىمەن «1000 IT سىنىبى - بالالار ءۇشىن» جوباسى قولعا الىنىپ، قازىرگە 500 گە جۋىق رەسپۋبليكا اۋماعىنداعى مەكتەپتەر زاماناۋي قۇرىلعىلارمەن جابدىقتالىپ وتىر. ەندى ءوزىنىڭ وتباسىنىڭ اتىنان «مەكتەپتەگى بالالاردىڭ بولاشاعى جارقىن بولسىن» دەگەن ماقساتتا اۋىل مەكتەبىنىڭ ءبىر كابينەتىن تولىقتاي جابدىقتاپ بەردى.
ءوزى قالالىق جەردە وقىعانىمەن اتا- اناسى وسى ءتاتتى اۋىلىندا تۋىپ، قىزمەت ەتكەن. كىشكەنتايىنان اكەسى مۇتالىگە «مەن اۋىلعا كومەك بەرگىم كەلەدى» دەگەن نيەتتە وسكەن بالا ءابۋتالىپ وسە كەلە ارمانىن جۇزەگە اسىردى. IT كابينەتتىڭ اشىلۋ سالتاناتىندا ارداگەر ۇستازدار مەن اۋىل اقساقالدارى ىزگى تىلەك نيەتتەرىن ءبىلدىرىپ، سانالى دا ساليقالى ۇرپاق وسىرگەن اناسىنا العىستارىن ءبىلدىردى. ال مەكتەپ وقۋشىلارى كونتسەرتتىك باعدارلاما بويىنشا ونەرلەرىن ورتاعا سالىپ، ايبار رايىمقۇل جەرگىلىكتى اقىن ءابدىمومىن قوڭقابايەۆتىڭ جەكە كاسىپكەرگە ارناعان ارناۋ ولەڭىن مانەرلەپ وقىپ بەردى.