موڭعوليا استاناسىندا 12 كۇندىك قاتاڭ كارانتين باستالدى

ۇلانباتىر. مونتسامە- قازاقپارات. قازاقپارات - موڭعوليانىڭ ۇلانباتىر قالاسىندا بۇگىن، 11 -اقپان جەرگىلىكتى ۋاقىتپەن تاڭعى ساعات 6 دان باستاپ قاتاڭ كارانتين جاريالاندى، دەپ حابارلايدى قازاقپارات مونتسامە اگەنتتىگىنە سىلتەمە جاساپ.

بۇل ۇلانباتىردا كوروناۆيرۋستىڭ تارالۋىن توقتاتۋ ءۇشىن قابىلدانعان ءۇشىنشى قاتاڭ كارانتين. كارانتين كەزىندە «ءبىر پاتەر - ءبىر تەست» اكسياسى ۇيىمداستىرىلىپ، كوروناۆيرۋس جۇقتىرعان ناۋقاستارمەن تىكەلەي نەمەسە جاناما بايلانىستا بولعان ادامدار انىقتالىپ، وقشاۋلانادى.

كۇن سايىن 35-40 مىڭ ادام COVID-19-دىڭ بار- جوعىن انىقتايتىن تەست تاپسىرادى. 12 كۇندىك كارانتين كەزىندە ستراتەگيالىق مەكەمەلەر مەن 14 سالا قىزمەتىن جالعاستىرادى. سونداي- اق بيلىك وكىلدەرى اي كۇنتىزبەسى بويىنشا كەلەتىن ۇلتتىق جاڭا جىلى شاعان (ساگاان سار) مەرەكەسىن تويلاۋعا تىيىم سالدى.

بيىل بۇل مەرەكە 12-اقپاندا باستالادى، ءبىراق ەل ىشىندە كوروناۆيرۋس تاراپ جاتقاندىقتان موڭعوليا ەكىنشى جىل قاتارىنان بۇل ءداستۇرلى مەرەكەنى تويلامايدى. بىلتىرعىداي قالا جانە پروۆينتسيا تۇرعىندارى مەرەكەنى ۇيدە وتباسىمەن عانا اتاپ وتە الادى. مەرەكەنى اتاپ وتۋگە ارنالعان ءىس- شارانىڭ ءبارى توقتاتىلدى.