پوليتسەي تەرەڭدىگى 12 مەترلىك قۇبىرعا ءتۇسىپ كەتكەن بالانى قۇتقاردى
ناقتىراق ايتساق، ورداباسى ا پ ب- عا كەشكى ساعات 20:30 شاماسىندا كىشكەنتاي بالا حابارلاسىپ، اعاسىنا كومەكتەسۋلەرىن سۇرايدى. حابارلاما الىسىمەن وسى اۋماققا بەكىتىلگەن ۋچاسكەلىك پوليتسيا ينسپەكتورى ارەكەتكە كوشەدى. ويىن تولىق جەتكىزە الماسا دا بالامەن تىلدەسىپ، قانداي دا ءبىر مالىمەت الۋعا تىرىسادى. دەگەنمەن وزىنە بەكىتىلگەن اۋماقتىڭ وي- شۇقىرىن تولىق بىلەتىنىنىڭ ارقاسىندا، پوليتسەي از ۋاقىتتىڭ ىشىندە بالانىڭ ايتقان جەرىنە توپشىلاپ جەتەدى.
ءتارتىپ ساقشىسى 12 جاسار بالانىڭ سۋ جينالاتىن قۇبىرعا ءتۇسىپ كەتكەنىن انىقتايدى. سودان بادام اۋىلىنىڭ ۋچاسكەلىك پوليتسيا ينسپەكتورى پوليتسيا كاپيتانى ساكەن سايلانوۆ بىردەن جاس بالانى شىعارۋعا كىرىسەدى. قاينار اۋىلىنىڭ سىرتىندا ورنالاسقان بۇل قۇبىردىڭ تەرەڭدىگى 10 مەتردەن اسادى. وسىعان وراي پوليتسەي ارىپتەستەرىن كومەككە شاقىرىپ، ءوزى بالا تۇرعان قۇبىرعا تۇسەدى. قاتتى توڭعان بالاعا كيىمدەرىن كيگىزىپ جىلىندىرعان. وسى ارالىقتا باسقا ءتارتىپ ساقشىلارى ارقان اكەلىپ، بالا امان-ەسەن سىرتقا شىعارىلادى.
بەلگىلى بولعانداي، 12 جاسار بالا ىنىسىمەن ويناپ ءجۇرىپ ابايسىزدا اتالعان بەتون شۇڭقىرعا ءتۇسىپ كەتكەن. وزدىگىنەن ارى- بەرى شىعامىن دەپ بىرنەشە ساعات تالپىنعانمەن ەش ناتيجە شىقپاعان. سودان كەيىن ىنىسىنە پوليتسياعا حابارلاسۋىن سۇراعان.
وعان قوسا وسى 2-3 ساعات ىشىندە ويىنعا شىققان ەكى بىردەي بالاسى جوق بولعاننان كەيىن اتا-انالارى، تۋىستارى مەن كورشىلەرى دە ىزدەۋگە شىققان. سوڭىندا بالالار امان- ساۋ كۇيىندە وتباسىنا قايتارىلدى. ءوز كەزەگىندە بالاسىن تاۋىپ بەرگەن ءتارتىپ ساقشىلارىنا اق جاۋلىقتى انا اقجارما تىلەگىن ارناپ، جۇمىستارىنا تابىس تىلەدى.
«اياق استى ورىن العان كەلەڭسىزدىكتە بالامدى جالعىز قالدىرماي، قولداۋشى ءارى قۇتقارۋشى بولعاندارىڭىزعا مىڭ العىس! اسىرەسە، ۋچاسكەلىك پوليتسەيىمىز ساكەنگە راقمەت ايتامىن»، - دەپ شىنايى ريزاشىلىعىن ءبىلدىردى.