كوروناۆيرۋس جۇقتىرعان كەزدە ءولىم قاۋپىن 12 ەسەلەيتىن اۋرۋ اتالدى

نۇرسۇلتان. قازاقپارات - سان-فرانسيسكوداعى كاليفورنيا ۋنيۆەرسيتەتىنىڭ عالىمدارى كوروناۆيرۋس جۇقتىرعان كەزدە ءولىم قاۋپىن 12 ەسەلەيتىن اۋرۋ ءتۇرىن اتادى، - دەپ حابارلايدى MedicalXpress.

زەرتتەۋ جۇمىستارىنىڭ ناتيجەسى بويىنشا، ديابەتى بار ناۋقاستار كوروناۆيرۋس جۇقتىرعان جاعدايدا اۋرۋحاناعا جاتقىزىلۋى كەرەك جانە ولاردا ءولىم قاۋپى 12 ەسەلى. سونداي-اق پاندەميا كەزىندە جينالعان ستاتيستيكا بويىنشا، ديابەت كوروناۆيرۋس جۇقتىرعان ناۋقاستاردىڭ جاعدايىن ۋشىقتىراتىن اۋرۋلاردىڭ ىشىندە جۇرەك-قان تامىر اۋرۋلارىنان كەيىنگى ەكىنشى ورىندا.

كاليفورنيا ۋنيۆەرسيتەتىنىڭ عالىمى پراكاش ديدۆانيا ديابەتى بار ادامداردا بۇيرەك اۋرۋلارى، ينسۋلت، ميوكاردا ينفاركتى پايدا بولىپ، كورۋ قابىلەتى ناشارلايتىنىن ايتادى. ەڭ قاۋىپتى اسقىنۋ - يممۋندىق جۇيەنىڭ تيىمدىلىگىنىڭ تومەندەۋى.