جەتىسايدا ەگىستىك القابىنىڭ باسىندا بولعان جاپپاي توبەلەستە 12 ادام جاراقات الدى
وسى وقيعاعا قاتىستى ەكى ادام قاماۋعا الىندى، دەپ حابارلايدى قازاقپارات ءتىلشىسى.
وبلىستىق پ د باسپا ءسوز قىزمەتىنىڭ مالىمەتىنشە، جاپپاي توبەلەستىڭ ۆيدەوسى الەۋمەتتىك جەلىگە تاراعان. وندا ەگىستىك باسىنداعى ديقاندار ءبىر-ءبىرىن تاياقتاپ جاتقانى كورىنەدى. وقيعانى تەكسەرگەن جەتىسايلىق پوليتسەيلەر توبەلەستىڭ 29-مامىر كۇنى بولعانىن ايتادى. ەگىستىك القابىنا شۇعىل شىققان ءتارتىپ ساقشىلارى ادامدار اراسىنداعى توبەلەس ەگىستىككە جىبەرىلەتىن سۋعا تالاستان پايدا بولعانىن انىقتاعان.
توبەلەستەن كەيىن دارىگەردىڭ كومەگىنە 12 ازامات جۇگىنگەن. ولاردىڭ بەسەۋى جەتىساي اۋداندىق اۋرۋحاناسىنا جاتقىزىلىپ، وزگەلەرى العاشقى مەديتسينالىق كومەكتەن كەيىن ۇيلەرىنە قايتارىلعان.
«اتالعان جايت ق ر ق ك-تىڭ 293-بابىمەن تىركەلدى. قازىرگى تاڭدا تۇرعىنداردىڭ العان دەنە جاراقاتتارىنىڭ اۋىرلىعىن انىقتاۋ ماقساتىندا سوت- مەديتسينالىق ساراپتاما تاعايىندالدى. ءتارتىپ ساقشىلارى تەكسەرۋ بارىسىندا وسى توبەلەسكە قاتىسقان 2 ازاماتتى ۇستاپ، ۋاقىتشا ۇستاۋ يزولياتورىنا قاماۋعا الدى. قازىرگى ۋاقىتتا اتالعان جايت بويىنشا بارلىق تۇلعالاردى جانە كىنالىلەردى انىقتاۋعا باعىتتالعان تەرگەۋ امالدارى جۇرگىزىلۋدە. وقيعانىڭ تولىق ءمان-جايى تەكسەرىلۋدە» دەلىنگەن حابارلامادا.
اۆتور: اينۇر اقبايەۆا
