وتە زەرەك 12 جاستاعى بالا ستۋدەنت اتاندى - فوتو
بۇل تۋرالى بالانىڭ اكەسى داۋرەنبەك نىسانوۆ ءوزىنىڭ فەيسبۋكتەگى پاراقشاسىندا جازدى. «بۇگىن ءبىز ءۇشىن قۋانىشتى كۇن بولدى! ق ب ت ۋ- دىڭ رەكتورى ءوز قولىمەن مەنىڭ ۇلىم 12 جاستاعى ۆۋندەركيند مىرزاش ابزال داۋرەنبەك ۇلىنا تەگىن وقۋعا ق ب ت ۋ- دىڭ ىشكى گرانتىنىڭ سەرتيفيكاتىن تابىستادى!
ق ب ت ۋ- دىڭ اكىمشىلىگىنە، رەكتورى ك. بەيسەمبەتوۆ مىرزاعا، ۆيتسە-پرەزيدەنتى ت. وماروۆ مىرزاعا جانە جاۋاپتى حاتشىسى د. كوكتوۆ مىرزاعا ءبىزدىڭ ۇلىمىز ابزالعا وسىنداي قولداۋ كورسەتكەندەرى ءۇشىن مىڭ العىس!»، - دەدى اكەسى. 12 جاستا مەكتەپ بىتىرگەن ابزال مىرزاش تۋرالى وسىدان ءبىراز بۇرىن جاريالاعان بولاتىنبىز.
مەكتەپتى ەكستەرن تۇردە بىتىرگەن وقۋشىنى سۇلەيمەن دەميرەل ۋنيۆەرسيتەتى، حالىقارالىق IT ۋنيۆەرسيتەتى، ابىلاي حان اتىنداعى شەت تىلدەرى جانە حالىقارالىق قاتىناستار ۋنيۆەرسيتەتى وقۋعا شاقىرعان بولاتىن. «ۆۋندەركيند» بالا 3 جاسىنا جەتپەي-اق، ارىپتەردى قوسىپ وقي باستاعان. ال، 4 جاسىندا ەكى تاڭبالى سانداردى كوبەيتە الاتىن، - دەيدى اناسى جازيرا دوسكەيەۆا.
«ابزالدىڭ ەستە ساقتاۋ قابىلەتى وتە جاقسى ەكەندىگى بىلىنەتىن. ايتقان نارسەنى تەز قاعىپ الاتىن. 2 جاسىندا كوشەگە شىعىپ، كولىكتەردىڭ ماركالارىن تانىستىرعان بولاتىن اكەسى. كەلەسى كۇنى ءبارىن تاقىلداپ ايتىپ تۇردى. 3 جاسىنان وقىدى. ءوزىمىز دە قىزىعىپ نەشە ءتۇرلى تانىمدىق كىتاپتاردى اكەپ وتىراتىنبىز. سونىڭ بارلىعىن دالاعا ويناۋعا شىقپاي از كۇندە وقىپ تاۋىسىپ تاستايتىن»، - دەدى جازيرا.
ءبىر قىزىعى، اتا-اناسى بالانى ەشقانداي دامىتۋ ورتالىعىنا بەرمەگەن. ابزال مىرزاش №16 مەكتەپتىڭ ورىس سىنىبىندا 1-2 -سىنىپتى وقىعان. 3- سىنىپتان 136 -قازاق مەكتەپ گيمنازياسىنا قابىلدانعان. ەرەكشە دارىندى بالانى مۇعالىمدەرى جىلدا سىنىپتان سىنىپقا سەكىرتىپ وتىرعان. وسىلايشا، ول 3,5,7,9,11 سىنىپتاردى عانا وقىپ نەبارى 7 جىلدا 12 جاسىندا مەكتەپ تۇلەگى اتاندى.
ابزال مىرزاش ۇلى مەكتەپ باعدارلاماسىن الدىن الا يگەرە كەلە، حالىقارالىق، رەسپۋبليكالىق وليمپيادالاردا جەڭىمپاز اتانعان. بالانىڭ اكەسى داۋرەنبەك نىسانوۆتىڭ ايتۋىنشا، ابزال بيىل بريتانيا كونسۋلدىعى جانىندا IELTS تەستىن تاپسىرعان.
«جازباشا تاپسىرمادا «ءىرى كومپانيالار ۇلتتىق ويىندارعا نەگە دەمەۋشىلىك جاسايدى؟» دەگەن جاسىنا ساي كەلمەيتىن تاقىرىپتا ەسسە جازۋ كەرەك بولعاندىقتان، بالى 5,5 بولىپ قالدى»، - دەيدى اكەسى.
بالانىڭ اتا-اناسى ابزالدى باسىندا شەتەلگە وقۋعا جىبەرۋگە تىرىسقان. الەمدىك تەحنيكالىق ۋنيۆەرسيتەتتەر اراسىندا «ەكستەرن» ءبىتىرىپ كەلگەن بالالاردى قابىلدايتىن ۋنيۆەرسيتەتتەر از ەكەن. ابزالدىڭ اتا-اناسى ۇزاق ويلانىپ ماسساچۋسەتس تەحنولوگيا ينستيتۋتىن تاڭدايدى. «الايدا ولاردا نەگىزگى تالاپ وتباسىمەن تۇگەل كوشىپ كەلۋ كەرەك ەكەن. سونىمەن قازاقستاننىڭ ۋنيۆەرسيتەتتەرىن تاڭدادىق. بالامىز ۇ ب ت تاپسىرىپ 117 بال الىپ شىقتى. ابزالدىڭ بالى ودان دا جوعارى بولار ەدى. تەك وعان نەگىزگى پاندەرىنەن ەسەپ شىعارۋعا كوپ ۋاقىت كەتكەن»، - دەدى اكەسى داۋرەنبەك نىسانوۆ.
اۆتور: گۇلميرا عوسمان-ءالي
