الەۋمەتتىك جەلىگە 12 جاستاعى ديماشتىڭ سۇحباتى ورنالاستىرىلدى - كەسكىن
ۆيدەودا 12 جاستاعى ديماش 2006 -جىلى «قازاقستان- اقتوبە» تەلەارناسىنىڭ ستۋدياسىندا جۇرگىزۋشى مەن تەلەكورەرمەندەردىڭ سۇراقتارىنا جاۋاپ بەرۋدە. ق ر تاۋەلسىزدىگىنىڭ 15 جىلدىعى قارساڭىندا تۇسىرىلگەن تاڭعى باعدارلامادا اڭگىمە اباي قۇنانباي ۇلى، ءاليا مولداعۇلوۆا، مانشۇك مامەتوۆا سىندى قازاقستاننىڭ ماڭدايالدى تۇلعالارى جونىندە ءوربىدى.
سونداي-اق سول كەزدەگى التىنشى سىنىپ وقۋشىسى ءوزىنىڭ ساباعى تۋرالى ايتىپ بەردى. «مەنىڭ باستى ارمانىم - حالقىما پايدالى بولعىم كەلەدى»، - دەدى بۇگىندە تانىمال ءانشى ديماش قۇدايبەرگەن. سۇحبات سوڭىندا ول نىعمەت بايمۇحامەدوۆتىڭ ولەڭىنە جازىلعان احمەت جۇبانوۆتىڭ «اق كوگەرشىن» ءانىن ورىنداپ بەردى.
ەسكە سالايىق، وسى كۇندەرى وتانداسىمىز قىتايدىڭ Hunan.TV تەلەارناسىنداعى «Singer» ءان بايقاۋىنا قاتىسىپ جاتىر. بۇگىنگى ۋاقىتقا دەيىن بايقاۋدىڭ 6 كەزەڭى ءوتتى، بارلىعى 10 كەزەڭنەن تۇرادى. ديماش ولاردىڭ بارلىعىندا دا قاجەتتى داۋىستار جيناپ، كەلەسى كەزەڭگە ءوتىپ وتىردى.
ەرەكشە تالانتىمەن قىتايلىق كورەرمەندەردى تامساندىرعان ول، بىرنەشە كەزەڭدە العاشقى ورىننان كورىندى. ديماش قۇدايبەرگەن قىتايلىق ساحنادا فرانتسۋز تىلىندەگى «SOS d'un terrien en détressە» كومپوزيتسياسىن، 28 -قاڭتار كۇنى وتكەن ەكىنشى كەزەڭدە رەسەيلىك ۆيتاستىڭ «وپەرا №2» ءانىن، Queen توبىنىڭ «Show must go on» ءانىن، قىتاي تىلىندە «كۇزگى مۇڭ»، پيتەر دجين ەرناندەستىڭ (برۋنو مارس) رەپەرتۋارىنان «Uptown Funk» اندەرىن جانە سوڭعى وتكەن 6-كەزەڭنىڭ تۇسىرىلىمىندە الەمگە تانىمال ءانشى لارا فابياننىڭ رەپەرتۋارىنان «Adagio» ءانىن ورىندادى.
بۇل كەزەڭ قىتاي تەلەارنالارىنىڭ ەفيرىندە 25 -اقپان كۇنى كورسەتىلەدى. قىتايلىق الەۋمەتتىك جەلىلەردىڭ جازۋىنشا، ديماش اتالمىش سوڭعى كەزەڭدە ءبىرىنشى ورىنعا قول جەتكىزدى.
