قايىرىمدى جاستار 12 ميلليون جيناپ بەرگەن جانەلدىڭ وتاسى ءساتتى ءوتتى
الماتى ەرىكتىلەر ۇيىمى وسىلايشا ەكى اي بۇرىن بەرگەن ۋادەلەرىن ورىندادى. وسى وقيعادان كەيىن اراعا جەتى كۇن سالىپ، بۇلدىرشىنگە وتا جاسالدى.
بۇل تۋرالى Stan.kz حابارلايدى.
جانەل جايلاۋوۆانىڭ 5 جاسقا دەيىن ءبىر بۇيرەگى جۇمىس جاساماي كەلگەن. قازىر ءبۇلدىرشىننىڭ قوس بۇيرەگى ىستەن شىققان. اراعا ءبىراز ۋاقىت سالىپ جانەلگە دونور تابىلدى. مۇنىمەن قاتار، قازاقستاندىق جاستار ءتۇرلى قايىرىمدىلىق شارا ۇيىمداستىرىپ، جانەلگە قاجەتتى 12 ملن تەڭگەنى جينادى. وسىدان كەيىن اراعا 7 كۇن سالىپ، بۇلدىرشىنگە وتا جاسالدى. كۇنى كەشە جەلىدەگى «قايىرىمدى جاندار» توبى جانەلدىڭ جان ساقتاۋ بولىمىندە جاتقانىن حابارلاعان بولاتىن.
«كەشە الماتىدا وتاندىق دارىگەرلەر كىشكەنتاي جانەلدىڭ بۇيرەگىن الماستىردى. 5 ساعاتقا سوزىلعان وتا بىلىكتى مامانداردىڭ قاتىسۋىمەن ءساتتى ءوتتى! قازىر كىشكەنتاي حانشايىم جان ساقتاۋ بولىمىندە جاتىر. دارىگەرلەردىڭ قاتاڭ باقىلاۋىندا! جۇرەگى الىپ- ۇشقان اتا- اناسى ءدال قازىر قىزىنىڭ نەگىزگى پالاتاعا اۋىسۋىن تىلەپ، اۋرۋحانا دالىزىندە كۇتۋدە. بارشا حالىقتىڭ دۇعا- تىلەكتەرىن اللا قابىل ەتىپ، جانەل امان- ەسەن تولىق جازىلىپ شىعۋىنا تىلەكشىمىز»، - دەپ جازادى اتالعان توپ.
اراعا ءبىر كۇن سالىپ ولار وتانىڭ ءساتتى وتكەنىن ءارى جانەلدىڭ پالاتاعا اۋىستىرىلعانىن ايتىپ جۇرتتى قۋانتتى. ءتىپتى، سوزدەرىنىڭ دالەلى رەتىندە جەلىگە جانەلدىڭ سۋرەتىن جۇكتەپ قويعان. «الاقاي! جانەل بۇگىن جان ساقتاۋ بولىمىنەن پالاتاعا اۋىستى! دەنساۋلىعى قالىپتى، قۇسۋىن توقتاتتى. جاڭا بۇيرەك جۇمىس جاسادى. ەندى ول گەمودياليز اپپاراتىنا تاڭىلمايدى. قۋان، قازاق! قارشاداي بالاپانىڭ جاڭا ومىرگە قادام باستى!» - دەپ جازادى سۋرەتتىڭ تۇسىنا.
بۇل جاڭالىق جانەلدىڭ اتا- اناسىمەن قاتار، بارشا قازاقستاندىقتى قۋانتتى. ولار جەلى ارقىلى اق تىلەكتەرىن جاۋدىرىپ، ءبۇلدىرشىننىڭ دەنساۋلىعىنىڭ جاقسارىپ كەتۋىنە دۇعا ەتەتىندىكتەرىن جەتكىزدى.
«امان بولسىن! جاسى ۇزاق بولعاي»، «قۋانىشىمدا شەك جوق! اللاح ءاردايىم قولداپ، قورعاي كور»، «بوتاقان، باقىتتى بول! دەنساۋلىعىڭ مىقتى بولسىن»، «وسىنداي جازبالاردى وقىپ قۋانىپ قالامىن. ۇزاق تا باقىتتى عۇمىر تىلەيمىن»، «اللا سىزدەرگە رازى بولسىن! كوپ جاساڭىزدار. باقىت پەن قۋانىش تىلەيمىن!»، «ساۋىعىپ كەت، قۇلىنشاق!»، «اللاعا شۇكىر، التىنىم عۇمىرلى بولعاي» دەپ جازادى جەلى قولدانۋشىلارى.
